【神霄曆｜0421，台語歌壇傳奇，蔡秋鳳】
講著台語經典歌曲，你會想著佗一條歌？《什麼樂》、《金包銀》抑是《爽著你艱苦著我》？
這幾條全攏是蔡秋鳳ê經典歌曲。佇蔡秋鳳22歲ê時，伊用一條《金包銀》予家己變做台語歌壇ê天后。伊ê鼻音唱法實在是誠特殊，予逐家攏kā伊記牢牢。
蔡秋鳳早期ê歌曲唱出濟濟江湖浪子ê心聲，閣予唱片公司定定收著受刑人寄來ê批。蔡秋鳳ùi出道到今已經行過44年，今仔日拄仔好是伊ê生日，咱會當來感謝伊為台語歌壇歷史加添不止仔精彩ê一頁。