設定: 教會學校
分級: pg12+
背景:由寫手發揮
黑澤: 校草，選修讀bafs econ
安達:圖書館管理員，選修讀va 中史 文學
二人相同點: 同班，同社(黃社)
時間跨度:目前暫定從10月寫到12月尾，當中寫手可自行安排學校活動，再有延續活動想搞會再寫。
地點:由圖書館做base，延伸打通學校各處班房

限制:用2020年播劇反推二人高中時期係2005年至2008年。寫手如有想寫嘅潮流要圍繞返依段時間來寫。

注意:寫手個寫文速度因人而異，我地會慢慢甘度啲好玩同好sweet，同啲因為限制而延伸出問題嘅情節嫁。可能有一日短啲，有一日長啲，寫隔幾日都會有，甚至圍繞一個event寫多少少。祝願各位寫手文昌保佑，下筆如神!

黑澤行過去，按咗下counter檯面個鐘仔。
「要借書定還書?」安達從本書抬起頭，好習慣甘講咗平日嘅台詞。
「是甘的，中文miss咪比咗份book review要做嘅，你做曬未啊。」黑澤決定開宗明義先chok下對方進度，雖然平日安達好少在個班講野，但佢嘅讀書報告每次都會比miss讚寫得好好。
「我宜家睇到最尾果part，今晚開始寫。」講起睇書，安達嘅說話自然比平時多返少少甘。
「作為同班同學，你有沒一本簡單得來又方便寫得好深入嘅書介紹呢?」黑澤露出佢校草級別嘅笑容，試圖打造平易近人嘅一面，安達覺得佢嘅笑容過分耀眼。
「你鐘意香港定台灣作者?」
「我諗兩邊都ok?」
「散文集好快睇得曬，都可以睇詩集嘅。」
「甘你手上果本係?」
「白先勇《寂寞的十七歲》。」
「今次有沒特別限啲乜，果啲飛越青春系列小說借唔借得?」

留名等睇先！教會學校唔知點解諗起町田教，感覺分級隨時跳上18禁（喂！）

karissexxxw: 我地有同接龍組講最好摸下錫下就算😆😆😆，唔好甘快就衰十一啦。

留名跟

留名

留

留名睇文

留名睇文＋1

「okay㗎老師都冇限到，你可以試吓嘅，個啲其實你睇完書背個簡介就可以落筆，最尾反思昇華來來去去都係嗰幾句勵志嘢㗎啦，我覺得可以吖」
「咁我聽你講嫁啦，就呢啲啦，可唔可以問埋你啲書擺喺邊啊，你知啦我平時唔係成日嚟圖書館⋯」
「哦好啊你跟我嚟啊」
安達份人就好開明嘅，雖然同黑澤平時都冇兩句，但係如果對方問到，佢點都會幫人幫到尾。
「四個10A的少年啱唔啱？」
安達求其up咗個君比嘅書名，因為佢暫時淨係記得呢本擺喺邊。
「聽落OK喎」

見黑澤落搭，安達就搬咗個樓梯仔去書架旁邊，然後企咗上去搵。而黑澤就靜雞雞喺後面跟住佢，佢只係想快啲拎到書之後返屋企嗱嗱臨寫完份book report⋯仲有成份econ notes未溫啊唉⋯聽日又要quiz啦，個啲乜9野equilibrium 真係頭都大埋，講真如果安達可以幫佢寫埋份book report就好⋯
「嗯⋯搵到啦」
「哦!!!真係唔該晒⋯嘩!」
正當安達拎完本書，轉身想落反嚟嘅時候，佢就左腳kick右腳，成個人向前仆街。黑澤就企係佢下面，梗係即刻行埋去想拯救佢。
好彩黑澤隻腳生得長，就係呢個危險嘅一瞬間，佢伸出手接住左向自己迎面仆街嘅安達。而安達亦都毫無選擇，連人帶書跌咗落黑澤嘅懷裏。由於個衝擊有少少大，黑澤攬住安達之後向後跌多幾步，然後挨住左後面個書架。

「你冇事啊嗎？」黑澤依然挨住喺個書架度。

「冇...冇事啊...」唔知點解，安達突然間覺得心跳得有少少快，可能係因為啱啱差啲跌落地下所以佢有啲驚？

「冇事就好啦。」黑澤微微咁笑左一笑：「係呢？咁你諗住挨住我挨到幾時啊？」

「欸？」安達之前並冇意識到自己一直挨住黑澤，所以當黑澤突然間咁講一講佢都嚇左一跳：「啊，對唔住啊！」

「唔緊要啊！咁你都係為左幫我搵書先差啲仆親啫...」黑澤為左份book report 著想決定對安達好啲。

「啊，係喎，你本書！」安達突然間又記番起本書：「咦？本書呢？頭先明明仲喺我手架？」

安達開始左望右望試圖想要揾番本書，但係佢揾極都搵唔到：「死啦，唔見左本書實比老師鬧架！點算啊？」

「嗯？」黑澤望住安達明明就自己拎住本書，突然覺得呢個男仔又幾得意咁喎，下次應該可以撩下佢傾計：「你咪拎住左囉？」

「咦？！係喎！」安達覺得自己有少少7左所以紅到面哂：「我...我即刻幫你去借左本書先！」佢講完就向櫃枱嘅方向跑左去啦。

坐等睇文+1 老老豆豆我好似無見過人高中讀書報告都仲寫緊君比😂 ，赤楚b係咪專登想伏9黑澤架 ？ 利申：個人推薦老鼠記者

Kurusawa: 老鼠記者咪又係差唔多lv!! ((
其實係我唔知比佢寫乜好，是旦求其就9up咗君比

黑澤被安達挨住時既視角係咁甘樣樣：

oxygen2sai: omg係黑澤視角 點忍啊安達真係好pure啊

不如寫梁望峯lolll

oxygen2sai: 成張圖真係救曬命，美顏暴擊
gravebones: 下次安排佢睇www

甘安達既視角又可能係甘：

（太....太近啦///）

oxygen2sai: P圖好棒

shuk730:
安達簡單做完借書手續之後，就將學生證同本書遞比黑澤。

「如果你有啲咩唔明嘅話，就，過嚟問我都得嘅。下次需要嘅話再介紹書比你啦byebye。」
後面閱讀區坐咗全校最唔好惹嘅幾個靚女同佢啲跟班係度，係咁向櫃檯望過嚟嘅眼神令到一向好摺嘅小毒撚安達好唔自在。

佢哋眼都唔眨咁望實黑澤細聲講大聲笑，作為圖書館管理員應該有責任提醒佢哋細聲啲，但係安達邊度會有膽開口啫，佢只係希望黑澤快啲走，咁佢就可以安心煲埋佢本白先勇。

黑澤一行出門口，班女仔就衝埋嚟圍住安達一輪嘴咁問，頭先傾咗咩呀黑澤借咗咩書呀，安達被問到口窒窒唔識答，見問唔到啲咩班女仔就跑出去追住黑澤只係留低一陣攻鼻嘅body fantasies香水味。

黑澤覺得呢個係班入面冇咩存在感嘅同學又幾有趣。

因為自己都算係學校風雲人物又讀書叻，總會有好多人懷住唔同理由埋佢身，亦都有好多人唔鍾意佢搶晒風頭。
覺得同到黑澤fd沾光嘅人，利用佢嘅溫柔性格咩功課都借嚟抄考嘅人，成日圍住佢希望有位入嘅女孩子，黑澤又點會唔知道，佢只係選擇性咁扮聽唔到扮睇唔到，然後扮出一個老師同學覺得應該要有嘅leader嘅樣。

佢有問題請教安達，佢就好純粹咁用自己嘅長處去幫佢解決問題，唔會希望自己幫咗佢有咩回報，又或者係恥笑黑澤原來都有嘢唔識。

安達對自己嘅態度就好似對住其他普通同學咁，令到黑澤有時上堂悶悶地就開始觀察坐係窗邊嘅安達清同學。

今日放學嘅安達唔洗當值圖書館管理員，VA堂落堂之後佢都係打算去圖書館，諗住還埋佢本白先勇就翻屋企。同圖書館同一層嘅仲有staff room，安達孭住佢嘅畫筒經過教員室嘅時候，見到黃社嘅負責老師同黑澤傾緊計。
佢對老師點咗下頭，想繼續行去圖書館嘅時候，被老師叫住咗。
「安達同學，優一佢地準備緊陸運會嘅社務，宜家想搵人幫手搞banner同應援。黃社依個年級畫畫最叻嘅就肯定係你啦，不如來幫個手啊。」黑澤聽到老師講野附和地點頭，然後期待安達會有啲乜野反應。
「老師，我……依方面沒乜經驗。」被截住嘅安達聽到要搞甘大project都窒咗窒。
「如果你係擔心畫畫顧唔掂考試周嘅話，咪叫優一幫下手，佢讀書甘叻，core功課同溫書佢唔會托手爭嘅。」
「我好樂意幫忙。如果安達肯加入我地整應援，認真我地會鬆好多。」黑澤對住安達咪咪笑。

Aki_Yuki:
作為佛系青年，安達除咗在圖書館當值，就會在畫室畫畫，宜家考試周就忙返少少，會落自修室溫書。如果加埋搞應援，安達平靜嘅放學時光就一定會變得好忙。
但係佢真係唔識點拒絕，首先佢係黃社人，第二係溫書指導都有埋，真係搵唔到理由拒絕依個offer。
「甘……好啦。」
「多謝你阿安達同學，我地真係好缺人手，考試週之後兩個禮拜就係陸運啦，睇來優一佢地今個禮拜就可以等到banner份草稿。」
「搵老師真係幫到手，唔該你阿安達。」黑澤拍咗拍安達脖頭，安達縮咗縮。
「嗯，我去還書先，可以聽日返學再傾細節。老師byebye，黑澤……byebye。」安達道別之後打算快快手完咗圖書館，早知應該遲啲還書。
「安達我陪你行啊，趁出校門條路我地可以傾下少少個應援甘。老師再見。」黑澤果斷跟住安達打算同佢打個底，培養下友情。

katieleung1206:
本身安達仲諗住終於可以自己一個享受獨處時間，點知黑澤又話要跟埋嚟。作為一個專業嘅社恐毒L，安達已經開始擔心緊一陣得返佢哋兩個會deadair。話晒黑澤又係校草又盛，根本就唔係同自己同一個世界嘅人。
「安達啊，真係唔該晒你應承幫我哋手啊，如果唔係我都唔知點算好，哈哈」
「er⋯唔駛唔該⋯」玩嘢咩你識咁多人⋯你試下assembly個陣上台開咪徵designer，實全校成班女爭住沖上台都似。呢啲場面話真係搞到安達唔知點應好。
「um⋯係呢你哋諗好banner想點畫未㗎？」為咗唔好咁kam，安達自己主動開咗話題。

「其實仲未啊⋯我哋琴日淨係諗好咗話整鴨仔做今年嘅主題囉」
「喔⋯咁不如我呢幾日試吓起個稿畀你哋睇吓先？係咪寫反Yellow House係個banner中間就ok㗎啦？」
話晒遲啲又考試，其實安達真係想快快手搞掂佢。
「真係㗎？唉呀我真係唔知點多謝你好」
話咁快佢哋就行到門口，但係黑澤就停低咗腳步。
「係呢，今日上英文落堂個陣見你出咗去問Ms Cheung書，你係咪唔係好熟呢個chapter啊？」
「呃..?」痴線咁都畀佢見到⋯安達明明記得每次數學落堂嗰陣，就會有幾個姣婆圍埋去黑澤到扮唔識問佢數，仲以為佢咁忙唔會留意到自己呢啲班上面嘅small photato添。

「其實呢個chapter我暑假個陣補習已經學咗所以都幾熟，不如咁啦，聽日放學你嚟我屋企，我又可以幫你補下數，之後你又可以起埋banner個稿，會唔會方便啲啊？」
「⋯下」
「咁你又唔係committee，冇奶油要你無端端做義工嘅」
「我⋯errrrr⋯」
「你當畀個機會我報答你啦，OK？」
出現了！殺傷力100嘅醉迷人sunshine笑容！
「咁⋯er⋯好⋯好啦」
「YEAH！就咁話啦，我聽日放咗學之後班房等埋你一齊走！安達Bye bye~」
黑澤就係咁，單邊咩住個書包，轉個頭對住安達單咗一下眼就走左。

okatsu: 「呢個男仔真係奇怪...」安達目送住黑澤離開嘅身影心諗。「點解係都要幫我補習啫？其實自己一個更開心啦唔係咩？」

第二日番到學校，全日安達都一直好忐忑不安咁諗住黑澤話放左學之後話要幫佢補習呢件事。到底因間佢會帶我去邊呢？圖書館？Starbucks？定係m記呢？啊，m記好似最近新出左隻飽幾好食咁喎，仲有個期間限定嘅抹茶新地添...安達成日都喺度諗埋呢啲無無謂謂嘅嘢，話咁快就到左放學嘅時間啦。

「安達？」

「啊！」

黑澤嘅呼喚成功嚇親安達。

「我冇嚇親你啊嗎？」黑澤再一次覺得面前呢個同學傻得黎又幾可愛：「你諗緊啲咩啊？」

「抹茶新地...啊唔係.... M記新包....啊！唔係唔係！」安達唔小心將心入面嗰句講左出黎：「係呢？我哋係咪去溫書啊？」

「係啊，琴日咪講左去我屋企囉？」黑澤順手拎起左安達啲書幫佢疊埋一疊：「你ready我地就行啦。」

「屋企？屋企？屋企？咁重要嘅嘢我居然聽漏左？死啦，去到佢屋企會唔會佢全家都喺度架？咁因間見到點打招呼好呢？叫Auntie ？叫伯母？啊！點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊點算好啊？」安達就咁陷入左呢個無限嘅糾結之中。

Hi Auntie要嚟了嗎

我好期待家姐出場丫

shuk730:
「喂呀～總之陣間我唔去BB你度啦，我有嘢十萬火急呀，係呀唔講啦byebye～」

攤係梳化啱啱收男友線嘅黑澤家姐九秒九掉低手中睇到一半嘅yes，擘大個喉嚨就嗌係廚房嘅黑澤太太，

「媽咪！優一話陣間要帶朋友仔上嚟玩呀！嘩咁大個仔第一次見佢帶朋友返屋企呀！」

黑澤太聽到大女興奮嘅大嗌，不為所動咁沖咗壺茶，
「哎呀仲以為優一唔會話你知添，媽咪尋日就知啦，細佬叫我買定蛋糕我就知今次我哋優一終於大個仔啦......好心你就唔好成日整鬼細佬啦，又唔係唔知佢由細到大都無你符。」

「咩喎，我識做啦，優一第一次帶人返屋企我呢個做家姐嘅唔過下眼點得呢。」
黑澤家姐打開雪櫃拎咗兩件蛋糕嘅其中一件，一睇就知係黑澤買嚟自己食嘅芝士蛋糕，開心咁坐喺飯枱食蛋糕。

安達捉實書包兩條孭帶好似隨時要跳傘咁，一邊同黑澤吹水（其實係接黑澤嘅話題）一邊係度同自己彩排緊陣間入到黑澤屋企要點算。

黑澤真係見多識廣，同佢傾計好smooth無安達預計嘅dead air，佢一直都以為好似黑澤呢啲周身刀嘅風頭躉一定唔係講女就係講讀書，再唔係就提起學界比賽或者莊務，無論係邊樣都係安達平時唔會接觸嘅嘢。

點知佢哋講起M記新出嘅抹茶新地先知原來佢哋都鍾意食蘋果批，黑澤成個最會笑鳩班入面啲毒撚嘅現充咁但係追動漫都幾貼下。

就算係講起Harry Potter都頭頭是道，重要係痴線到睇英文版，搞到安達都唔好意思講自己其實雖然讀英中但係一直都係睇皇冠中文版......

「估唔到原來黑澤係咁樣嘅，之前都唔知添。」

「乜原來安達係咁睇我嘅咩，哈哈，你以為我係點樣嘅人？」

下晝四點上山嘅單層巴士，午後西斜嘅陽光隨著彎彎曲曲嘅山路間歇咁照入無咩人嘅車廂，黑澤同安達坐係車尾跟住架車搖搖晃晃。
黑澤問佢個陣，架巴士啱啱掟咗個彎，黑澤個膊頭順住慣性撞埋嚟果陣安達見到佢嘅笑容凝結咗一下。

安達覺得有啲後悔頭先衝口而出，呢個笑容佢有時都會見到，就係係黑澤比班女圍住氹氹轉，或者係同校隊攬頭攬頸夾佢去小賣部萬歲個陣嘅表情。

「唔，雖然我又毒又摺，不過平時畫下畫睇下書我就好滿足架啦。黑澤咁忙，如果係忙得開心咁就好，我覺得你好似有啲攰。」黑澤聽完之後露出一個疑惑嘅表情，令到安達手足無措唔知擺邊度好，佢又開口夾着脷亂講嘢啦唉。

「呀你當冇聽過啦，Sorry呀我唔應該咁講......」

黑澤搖搖頭伸手撳鐘下個站落車，
「你係第一個同我咁講嘅人呀安達......我好意外。」

同場加映

同場加映

「唔……我都係講返我睇到啲乜野甘姐。」黑澤望住安達講完擰轉頭望車窗飛逝嘅秋天風景。

「🎶那溫暖　的陽光　像剛摘的鮮豔草莓
你說妳捨不得吃掉這一種感覺

雨下整夜　我的愛溢出就像雨水
院子落葉　跟我的思念厚厚一疊……」
安達嘅手機鈴聲從褲袋響起，黑澤一聽首歌就知係周董嘅七里香，再望住安達放在耳邊聽電話，就認出果部咪係同佢宜家一樣用緊嘅索愛w800i。真係岩啦，無諗過佢地用緊同款。

「喂，媽咪。嗯，唔洗煮我嘅飯啦，今晚嚮同學到溫埋書先返……唔，幾點返啊?」
「安達，要落車啦。」黑澤拍咗下安達脖頭。
「媽咪妳等我一陣下，我落咗車先。」安達無cut電話，快手快腳孭返好個書包就跟住黑澤尾落車。

巴士好快落完客就揚長而去。
「喂媽咪，我問下我個frd先。」安達按住個電話，細細聲問黑澤。 「黑澤啊，今晚會搞幾耐架?」

「嗯，介唔介意比我聽下伯母嘅電話?」安達乖巧甘比咗部手機比黑澤。
「喂，伯母，你好丫我係黑澤優一，叫我優一就得啦，嗯…係啊，上年拿咗全級第一果個沒錯，無無無你甘樣讚我我會怕羞架，阿清肯做我朋友我都好開心…阿清好好啊今日來幫我地社畫畫甘，順便今日大家一齊溫下書，嗯你放心佢唔會搭尾班車翻屋企嘅，我10點半前一定會送佢坐車。好嘅，甘我比返電話比佢啦。」安達望住黑澤一路帶佢入私人屋苑，講電話一臉迎刃有餘，仲聽到阿媽傳來笑得好開心嘅聲，佢真係油甜舌滑好識氹女……等陣先，要搞到十點半???

安達拿返部手機返來，「喂，媽咪啊?」
『阿清你好好向優一學習啊，可以多啲去佢屋企沒問題嫁。你夜啲就算搭尾班車都OK嫁，上去記得比人地家長一個好印象。就甘啦，阿媽要炒餸煮飯啦，bye。』
安達好無奈聽到媽子一輪嘴機關槍講完就cut佢線。

上到黑澤屋企，黑澤按咗門鐘，安達就聽到門口有串好急跑過來嘅拖鞋聲，把聲到門後頓咗頓，跟住就見到春風滿面嘅一個大靚女開咗門。

「家姐=-=~~~你唔係今日約左男人咩。」黑澤拖長條氣顯得有啲唔耐煩。
「沒啊，咩男人，普通朋友來嫁咋。優一你嘅朋友仔甘q嘅。」
「姐姐好。」安達拘束地點咗點頭。
「你唔好嚇親我個同學啦。」
「跟優一叫我家姐就得啦。入來啦，拖鞋在玄關可以就甘換。當自己屋企就得啦，今晚留低食飯下。」家姐唔理黑澤個死亡射線，放佢地入來之後閂返道門，跟住聽到自己電話響又去返煲電話粥。
「打攪曬。」安達弱弱甘對住佢背影講，家姐個氣勢認真比起黑澤更神采飛揚。

黑澤屋企真係好大，首先個廳比佢屋企大，玄關裝飾櫃個獎杯量認真嚇親，盞射燈照住一入來望就快閃盲佢對眼。

「安達望咩?獎杯，噢有啲係我嘅，有啲係家姐嘅。」

「哇，你地好犀利啊。」
「術業有專攻嘛，我夠唔識畫畫囉，有你我放心好多。」黑澤帶安達兜過大廳準備入房。安達見到一個好有氣質嘅女人圍住條荷葉邊圍裙響廚房門口對佢微微笑，安達有禮貌點點頭並打招呼。
「姨姨好。」「媽咪。」
「乖，等陣送啲野食入你地房。係叫安達同學可。」
「嗯，我叫安達清。阿姨叫我阿清就得。」
「細佬帶阿清去放低書包啦。」跟住黑澤啦媽媽轉身開雪櫃。上緊樓梯嘅黑澤同安達沒聽到媽媽對住個雪櫃哎呀左一聲。
「家姐又食咗細佬件蛋糕啦。」

「安達…你隨意啲，唔洗甘拘謹哦。」
黑澤嘅房間同想象中預想差不多，一樣簡潔利落，間接照明都有幾個，令佢驚訝嘅係擺在度嘅半個書櫃全係原裝英文。
「嘩，你真係讀過曬啊。」
「之前扔咗批書，宜家買翻啲新書又滿返咁，依一邊全部睇曬唔捨得掉。係啦，甘嘅，我私底下可唔可以叫你阿清啊?」

「嗯…嗯，好啊，你叫啦。你同你媽媽都甘叫，無理由唔比你再叫嘅。」安達有啲怕羞翹住手指。
「阿清。」黑澤好開心甘對住安達叫佢嘅新暱稱，簡直係飛躍嘅發展。
「嗯。」安達應佢。
「阿清。」黑澤笑到個眼紋都有少少顯露。
「唔好意思啊，打攪到你地。」黑澤媽媽敲咗敲門。黑澤即刻整理表情。
「請入。」
「甘嘅，細佬對唔住啊，媽咪本身買咗兩件文華chesscake嘅，但你家姐食咗件，細佬介唔介意食士多啤梨蛋糕。」黑澤媽媽帶住個餐盤拿住兩杯綠茶同蛋糕入來放在黑澤即刻拉出來嘅細圓枱到。
「…家姐又搞咩啊。」黑澤有啲崩潰。
「唉我唔記得同佢講，其實件士多啤梨先係佢嘅，唔好嬲家姐啦。」媽媽摸左下黑澤個頭。
安達好難得見到黑澤平日唔會嚮學校出現嘅撒嬌樣。
「媽咪啊，你下次記得要同佢講啊。」 「唔緊要啦，黑澤我地share件cake啦。」

Aki_Yuki: 「你食啦阿清，我唔緊要嫁，文華件cake我好中意嫁，我真係想推薦比你食啊。」
「甘，一係我地兩件cake打對切，大家兩份一齊食開心啲。」
「嗯，就甘話啦。」
見到兩個細路感情甘好，黑澤媽媽真係好放心，阿清多啲來屋企都係好事，最近優一甘忙難得見佢笑得甘開心。留低啲餐具，比多啲私人空間佢地。
「嘩，黑澤依個好好食啊!!!」
「係咧，沒介紹錯咧。」見到安達個眼閃令令甘，發現到安達嘅新表情，黑澤個心跳好似漏咗一拍，原來安達係一個都鐘意甜品嘅為食鬼。
「嘴角嗨到少少餅碎啊。」黑澤拿張紙巾抹走安達嘅碎碎。
「多……唔該你。你…你都快啲食啦，食完我地拿拿聲…做野。」安達塊面比佢嗨咗下成塊面變得紅卜卜。

圖片供應
🍰文華餅房cheese cake蛋糕

-據聞係城中top1芝士蛋糕
-1963年配方
-芝士味濃，下層芝士味鹹重，上層忌廉和白朱古力帶出甜味

📱安達同黑澤嘅手機

-200像素相機影相+手機可以入mp3 set鈴聲+Walkman聽歌好正+2005年8月新出機款⭐+藍牙紅外線傳送方便兩個人喜歡嘅歌同相w

嘩⋯終於都見識到校草嘅威力⋯以前從來冇接近過黑澤嘅安達一直都唔明白點解啲女要對佢咁瘋狂。但係係頭先近距離畀黑澤摸到個一瞬間⋯佢好似明明地。
「哈哈，好啦，我夠㗎啦，你食埋呢半個蛋糕啦，我拎啲功課出嚟先」
黑澤順手將個紙巾放喺餐盆之後飲咗啖茶，就轉身打開個書包，拎唒今日要做嘅工作紙同書出嚟。安達見到佢已經擺好晒個陣咁濟，都唔夠膽再慢慢歎，快快手塞咗件cake入口，塞到兩邊面珠燈拱起唒，成隻倉鼠仔咁，仲搞到差啲哽親。黑澤一另返轉身就見到佢呢個有啲滑稽嘅樣子，又見佢好辛苦咁，就行過去幫佢掃下背脊。
「做咩呀你，慢慢食啦」
「咁⋯咳⋯咁我廢事唔夠時間做嘢吖嘛⋯」
「點會姐。一路食一路做都得㗎嘛」
係呢個時候安達幾經艱辛終於吞咗啖蛋糕。
「唔緊要啦⋯專心啲好⋯我哋⋯做功課先啊？」
「嗯，我教你先啦，溫書重要啲」

好快佢哋就拎開咗啲碗碗碟碟，然後拎唒啲功課出嚟。今日佢哋嘅英文功課係要自己計時做份pastpaper然後對答案，聽日返學老師再講解。
「不如我哋一齊做份卷先，你做完邊題唔明，咁我就睇吓我識唔識，之後再教你吖」
「好」
於是乎佢哋就好認真咁set好個timer開始做卷。
「嗶嗶嗶嗶，嗶嗶嗶嗶」
話咁快就夠鐘。睇咗個幾鐘英文，安達真係做到就嚟想暈咁滯。最後五分鐘佢先寫到最後一個section，連check卷都趕唔切。最令佢O晒嘴嘅係，係佢仲睇緊第一頁嘅reading個陣，眼尾就見到黑澤好似已經做到第三四頁。佢真係痴線㗎喎⋯安達最後長歎左一口氣就趴左係枱。
「唉～～～好難呀⋯」
「辛苦晒你啦，我哋交換對卷吖？」
「好啦⋯」

安達喺佢個靚靚筆袋度拎咗支紅筆出嚟，就同黑澤交換左份卷。改個陣佢根本就唔夠膽望自己嗰份⋯見黑澤好似寫咗好多嘢落去咁⋯實係錯左好多啦⋯相反改黑澤份卷，安達就tick得相當暢順。改咗成份卷先錯咗5題。
「嘩⋯⋯黑澤你真係好叻呀」
「哈哈唔好咁講啦，阿清你都唔差啊」
佢哋交換返份卷之後，安達望下自己個分。50/92。咁都唔差？？只係啱啱合格多少少咋喎⋯安達眼神死咁樣昂高頭望返住黑澤，發現佢個表情好唔甘心咁樣對緊答案。不過好快佢又回復返笑容。
「啊清吖，你錯左個啲題目呢我隔離都有盡量寫返個解釋㗎，你睇下明唔明？」
安達聽佢咁講先至打開份卷，發現黑澤用咗好多唔同顏色嘅筆幫佢mark番個答案係passage邊一段，又有幾句explanation 咁。仲有心機過自己上堂寫notes。

「啊清我教你呀⋯」趁着安達有少少感動嘅時候，黑澤突然間挨到安達勁埋，手臂貼住手臂咁樣，安達直情可以feel到黑澤講嘢嘅氣息係佢耳邊掃過。跟住黑澤就用手指住reading個頁俾佢用螢光筆間住咗嘅其中一行。
「拿，有時佢問你個詞語點解，其實你可以睇吓上文下理推理返出嚟㗎，好似第三條，佢問你line 3 faint點解，點解你揀almost invisible 嘅？」
黑澤突然間又另頭望住安達。感受到咁熾熱嘅視線，安達有少少緊張。
「因⋯因為⋯我以為係暈咗咁解⋯但係個mc又冇一個係解暈咗⋯但係⋯我又唔知gurgling點解⋯咁⋯然後⋯就⋯求其⋯」
只係短短講咗三句，見到黑澤望住佢嘅個種眼神，佢咪起隻眼，又戚下眉咁，安達真係緊張到隻眼碌黎碌去，唔知望邊度好。

「⋯哈哈哈，阿清你唔使咁緊張喎，我又唔係真係補習老師」
「喔⋯嗯⋯」
「我想話，既然你唔知gurguling點解，你可以睇下後面個字，係sound，聲音又點會用invisible去形容呢，所以答案係A，very quiet啊～faint gurguling sound成句嘅意思係非常之微弱嘅咕嚕聲。」
黑澤係呢個時候終於移開咗安達身邊，安達就急急腳拎住鉛筆喺上面寫返頭先黑澤講嘅中文解釋。
「黑澤你真係好勁呀⋯點解你英文咁叻嘅？」
「um…可能係我細個就睇開外國電視劇？又聽開英文歌，我好鍾意backstreet boys㗎」
「喔⋯」
「或者你鍾意睇啲乜嘢外國電影呀？」
「er⋯harry potter算唔算?不過我淨係睇咗中文版⋯」

「咁不如考完試再上嚟我屋企，我哋一齊睇英文版吖？睇一次開字幕，第二次唔開字幕，咁樣啲英文會進步得好快㗎！」
「好⋯好啊」
黑澤又講得幾有道理。講真你要安達睇完一本英文書對佢來講真係勁高難度。倒不如由鍾意嘅電影入手。安達都真係好希望可以會考之前進步多啲。

搞掂完啲功課，就係時候起banner稿啦。今次到安達係書包到拎唒啲架撐出嚟。由A5畫簿，到針筆，marker，顏色筆，咩都有。
「嘩⋯阿清你好專業啊」
「都係啲普通野啫⋯」
安達打開本畫簿開咗一頁新嘅。
「你哋話想要鴨仔⋯有冇話想隻鴨仔係得意啲啊定係點嘅樣㗎⋯？」
「嗯⋯琴日班committee話想畫一隻呢⋯新出㗎⋯但係我唔記得咗咩名⋯不如我畫俾你睇吓？」
「好吖」
黑澤跟手就拎起支鉛筆，係本畫簿中間到畫啊畫，又擦下佢，然後又再畫過，好鬼死認真。本身安達其實只係諗住叫佢撩幾筆睇吓個形狀。而家隔左成5分鐘，安達真係忍唔住叫停佢望下咩料。
「er⋯哈哈⋯啊清⋯我唔係好識畫呀⋯」

安達等到黑澤移開隻手，終於見到佢畫咗咩。成隻鬼畫符咁，如果一開始唔講係畫隻鴨，安達真係唔知佢畫緊啲乜。難得見到黑澤呢個有少少難堪嘅樣子，安達真係覺得好新奇又有啲可愛。不過講起新出嘅鴨仔公仔嘅話⋯
「Um⋯你係咪想講B.duck?」
「！！！係呀！阿清你咁都估到！你好叻呀！」
「呃哈哈⋯」
「啊清你可唔可以教下我畫呀⋯你都見啦我真係畫得好核突呀⋯我都好想畫靚啲」
話晒頭先黑澤都幫自己補咗習，安達都冇理由托黑澤手掙。
「好啊，我係隔離畫一筆，你跟住畫一筆好冇？」
「嗯！」

兩個人就咁哄埋咗喺同一本A5畫簿到，完全係近到頭貼頭嘅程度。安達首先畫左一個圓圈先。黑澤就跟住畫咗一個咩咩地嘅圓圈。跟住佢哋又畫咗兩點做隻眼，呢個都尚算容易。去到畫個鴨咀嘅時候，黑澤就搞唔掂啦。不停重畫都仲係咩唒，搞到隻鴨好似基因突變中咗輻射咁。
「黑澤啊其實你重畫嗰陣唔使擦晒成個咀㗎⋯你可以逐啲逐啲咁，睇吓邊一個位唔靚就改嗰度先，之後再改其他地方」
「喔⋯我試吓⋯」
但係冇天份就係冇天份，畫畫真係唔似其他讀書咁，講兩講就會做得好。再咁搞落去都唔係辦法，安達開始沉不住氣。
「Um⋯」
安達隻手臂係檯面跨過左黑澤，然後捉實咗黑澤拎住鉛筆嘅右手，同佢一齊揸實支筆。
「阿清⋯？」
「我同你一齊畫啦」

katieleung1206:
安達再用啲力握實黑澤隻手，就移返去畫紙到，然後開始畫一個好靚嘅嘴型。唔使五秒，一隻擁有正常鴨嘴嘅b.duck終於誕生咗。安達都好滿意自己嘅成果，不自覺咁扯起嘴角然後望住黑澤。
「拿！你睇下！啊⋯」
只不過，佢似乎忘記咗，其實呢一刻佢同黑澤塊面只有幾厘米嘅距離。安達瞪大隻眼唔敢郁。死啦，好尷尬。黑澤又唔知點解唔講嘢。佢哋嘅時間好似就停留咗係呢一刻咁。
直到走廊傳來腳步聲，黑澤家姐衝門而入。
「啊清！！」
「嘩！！」安達真係嚇到即刻彈開。
「媽咪煮好飯啦，落嚟食啦～」

佢哋做緊呢份卷
https://hkdsesomeoldsour...
2005 CE ENG PASTPAPER

Aki_Yuki: 佢地嘅互動真係令我dokidoki and then itai
安達b真係好岩去做迪士尼畫畫教室老師
:佢摸咗我隻手仔同埋差啲就錫到啦

好正呀你地！！！！等多啲一次睇好興奮

okatsu: 「好...好啊！」安達有少少尷尬咁應左一聲。

「咦？你地做緊啲咩啊？」黑澤家姐八八掛掛咁拎起左本畫簿黎睇：「啊！我知！呢隻野好似叫唔知咩duck咁啊嘛。」

「係啊，b.duck啊！」黑澤對於家姐無啦啦衝入黎有啲不滿：「家姐啊，其實你下次入嚟之前呢，可唔可以敲左門先呢？」

「哎，有咩所謂啫，我諗阿清唔會介意嘅！」黑澤家姐突然抬起頭望住安達：「係咪啊阿清？」

「唔...唔介意。」此刻安達嘅尷尬指數已經到達左頂點，佢塊面又開始紅啦。

「哎喲阿清你真係好鬼可愛架啫～」黑澤家姐繼續挑逗安達：「可愛到姐姐想一啖食左你啊～」

「咳，又話食飯嘅？」黑澤嬲嬲地咁打斷佢家姐：「我地快啲落去啦。」

「哇...估唔到黑澤都會發嬲喎...」安達心諗：「不過如果學校班囡囡見到佢發嬲一定都會覺得佢好charm架啫... 」

「嘿嘿嘿，係啦係啦，家姐都係唔阻住你地啦～我落樓等你地啦下～～」黑澤家姐臨走之前仲不忘向佢地單左一下眼。

「Sorry 啊，我家姐係咁...」黑澤向安達道歉：「你唔洗理佢架。」

「唔緊要...」安達塊面都仲係有啲紅。

「咁我地落去食飯先囉。」

「好...」

落到飯廳，安達見到Auntie仲喺廚房炒緊菜。呢個時候佢又開始糾結啦：就咁坐低係咪唔係咁好呢？我係咪應該問下有冇野要幫手呢？但係又好似有啲尷尬咁喎...

「你哋落左黎啦？」黑澤媽媽喺廚房拎住碟啱啱炒好左嘅菜芯行出黎：「黎黎黎，隨便坐得架啦。我畢埋個湯出嚟就開得飯架啦～」

「阿清你坐我隔離啦～」黑澤幫安達拉開張凳：「我媽煮飯好好食架，你因間唔洗客氣食多啲。」

「好，食得！」黑澤媽媽都出嚟坐低左。

「我唔客氣啦！」

「阿清，你試下呢個。」黑澤夾左舊雞比安達。

「啊...唔該你啊！」安達冇諗過黑澤無啦啦會夾餸比佢。佢一個反射動作就夾番條菜比黑澤：「你都食啦。」

黑澤家姐將呢一切都看在眼裡。佢嘅腐女之魂又開始燃燒啦：「係呢，阿清啊？你同優一好fd架？你地點識架？」

「咳...」突然被cue 嘅安達差啲啃親：「啊...我哋係同班同學...」

「同班同學？咁一定係好熟啦！」黑澤家姐奸笑：「你知唔知啊？優一佢咁大個仔都係第一次帶人番屋企咋！」

「下？第一個？」安達唔小心將心入面嗰句講左出口。

「係啊，第，一，個。」黑澤家姐強調：「所以你地一定係好好朋友架啫。」

「係啊係啊！」黑澤媽媽插嘴：「你知我呢個仔啦，平時怕羞到死！朋友都唔多幾個，所以佢話帶朋友番黎我都唔知幾開心啊！」

「怕羞？！Auntie 你地係咪有咩誤會啊？你地知唔知你個仔係校草黎架？佢成日比女圍架喎！」安達好想咁講，不過佢又真係唔夠薑講出口。

「喂啊，你哋唔好再講啦...」黑澤喺枱底踩左佢家姐一腳。

「哎，洗乜唔好意思咩？咁真係啊嘛！」黑澤家姐兜野拍左黑澤個背脊一下：「你講啦，你幾時有帶過朋友番黎啊！」

黑澤差啲比佢拍到連飯都噴埋出嚟。

「好啦，好啦。」黑澤媽媽露出慈母笑：「拿，你地忙啊，食飽飯好番房啦。媽媽因間切好生果拎上黎比你地啊。」

「唔該媽媽～」安達唔小心衝口而出。下一秒，全枱人一齊望住佢。

叫媽媽！！！！！

WWWWWW叫媽媽!!!!咁快!!!!

真心覺得下次可以直接貼plurk paste（眼神死）

shuk730:
呀，肯定係因為黑澤姐弟都係咁媽咪前媽咪後咁嗌auntie，所以自己先跟住嗌錯，好閒嘅啫，好似嗌錯老師做媽咪咁，嗯一定係咁。

尷尬到想匿落檯底嘅安達碌大對眼眨眨下，揸住碗飯唔知爬唔爬好嘅時候，黑澤家姐爽朗咁笑咗兩聲
「媽咪，恭喜你多咗個仔呀哈哈～阿清咁乖仔我都想做佢媽咪呀。」

黑澤啤咗家姐一眼就夾咗舊餸落姐姐得兩條菜嘅碗入面「好心家姐你就唔好亂講嘢啦，睇下搞到阿清幾尷尬，食多啲嘢啦。」

跟住佢又細細聲係安達耳邊同佢講唔使理佢家姐發噏瘋，黑澤家母女趁機交換咗一個欣慰嘅眼神。黑澤同邊個都可以傾計傾得好舒服大概係祖傳技能嚟，除咗頭先嗌錯媽咪嘅小插曲之外，成餐飯安達都食得好自在，完全無果種比唔熟嘅親戚包夾仲要比反應嘅壓力。

安達食嘢個樣真係好可愛。食到好食嘅嘢對眼會識發光咁，又唔會吝嗇對美食嘅贊美，就算食到個人好開心咁fing下fing下都唔會令人討厭。

黑澤諗起佢最近周不時上堂偷望安達，但係小息同lunch time黑澤通常都有嘢忙未見過安達食嘢個樣，淨係係小賣部見過一兩次佢同隔離班嘅柘植撳汽水機咁，知道安達不為人知嘅一面令到黑澤有種奇妙嘅滿足感。

好想再了解佢多啲，如果可以見佢笑多啲咁就好，黑澤諗。

Auntie再三拒絕安達幫手洗碗嘅提議就趕咗兩個男仔返房，跌咗係地下嘅畫簿提醒佢哋食飯之前尷尬嘅一幕，安達快快手執返起就開咗版新嘅紙，拎起架生就諗住起幾個稿比黑澤聽日拎番去同committee傾，黑澤好自然就哄埋去望住安達畫畫。

「er......黑澤你望住我，我畫唔出呀。」黑澤身上嘅熱氣一路谷埋嚟，令到安達一直回想起頭先黑澤塊面就係自己幾厘米之外，安達諗唔透黑澤點解會露出欲言又止嘅表情又唔出聲，如果係柘植嘅話應該會屌一聲就推開佢啦。

「咁呀，我唔望你，你慢慢畫吖。」黑澤笑咗一聲就係書櫃拎咗本書坐係安達隔離睇。

鉛筆劃過畫紙嘅沙沙聲，同偶爾揭書嘅聲響係寂靜嘅房入面交織埋一齊，黑澤好似係檯燈茲茲嘅電流聲入面聽到自己個心跳得比平時快咗一啲。

佢又揭咗一頁書嚟掩飾偷睇安達低頭畫畫嘅側面。

安達諗嘢果陣鍾意用鉛筆尾個擦膠頭篤住頸側邊，今次先第一次見到原來個度有粒墨......。

安達換筆個陣係檯面敲出微細嘅卡撻聲令黑澤收返視線係個本佢無專心睇嘅書上面，過多一陣安達拎起本畫簿左望望右望望滿意之後就遞俾黑澤睇。

「我畫咗幾個draft你睇下點，你同committee傾完之後睇下有冇嘢改話番比我知呀。」安達一邊講解幾個設計係點諗，黑澤就覺得果然術業係有專攻嘅，佢文字描述咗嘅諗法完全就係安達筆下畫嘅嘢。

本來黑澤就想直接嗌埋安達去開committee會嘅，但係頭先自己望住佢都硬晒軚咁，要佢係成班人面前即場傾idea即刻畫好似有啲為難佢咁......

「畫得好好呀！完全就係我諗嘅咁樣，應該都唔使點改嘅，有咩嘢我開完會再update你吖？」
「真係嘅？太好啦～」原來讚下安達佢就會笑到見牙唔見眼咁，以後係咪可以得閒讚多啲安達呢？

黑澤媽咪聽到房入面嘅笑聲就擺低碟飯後果係地下，敲咗兩下門提阿仔食生果就笑住落咗樓。

安達咬住舊蘋果望住牆上面個不停滴答滴答嘅鐘，書又溫完，畫又畫好咗先九點半，平時呢個時間佢應該碌係自己張床度煲緊漫畫，晏晝個陣黑澤好似同媽子講十點半之前就走？

但係一場嚟到又食又拎，自己嗌走好似好衰咁。仲有黑澤間房好大，三邊落床不特止，書枱隔離竟然仲有位擺張茶几仔夠位攤開本畫簿同埋工具，係度hea真係好舒服唔想走住。

「係呢，黑澤呀都差唔多......咦你都有NDS？」安達見到插喺床邊叉電嘅NDS即刻雙眼發光咁撲埋去，黑澤笑笑口咁拎比佢

「係呀，安達都有打開機？」
「有呀有呀，哎呀，我今日冇帶部機無得連機添，下次教你用金手指吖。」
「好呀，安達玩開啲咩架，你要唔要打陣機先走？」
「等我表演啦～」

安達好似開啟咗另一個開關咁，三兩下手勢就開咗個太鼓之達人打到啪啪聲，黑澤屈膝坐喺安達隔離睇佢打機都感受到佢自信爆棚咁，估唔到平日係班上面無咩存在感，明明畫畫好叻但係都無咩自信嘅安達都有咁嘅一面。

「黑澤要唔要都打下？」
「哦，好呀，不過我平時都少打嘅，肯定冇安達咁勁啦。」

就奇，黑澤接過部機之後啲手指快到安達睇唔清楚咁滯，
安達挫咗成個禮拜都未full combo嘅鬼級跑馬仔背景音樂黑澤一嘢就技術上full combo咗，係最後一粒音黑澤唔知係咪想留返少少薄面比安達特登miss咗。就好似個啲話自己考試之前無溫書但係考第一，安達即刻覺得頭先自己傻豬仔班門弄斧真係好樣衰......

「er，都係咁啱嘅啫，可能因為我彈琴彈過呢首歌所以記得啲節奏掛，第二首歌我就唔得架啦。」發現安達有啲唔妥嘅黑澤即刻幫佢搵咗台階下，講下其他話題安達都無擺係心上就開心返。

佢哋就好似有傾唔完嘅話題咁，直到安達電話再次響起。

「喂？媽咪？呀，我仲係黑澤屋企呀，哎呀乜十一點架拿？我返黎架啦。唉呀唔係呀唔係呀，唔會係黑澤度訓囉，人哋訓邊呀。好啦叫細佬唔好霸咗我個位訓呀，返架啦。」

安達收線之後擰轉面就見到唔知幾時走去換咗衫嘅黑澤，乜真係會有人落一落街都著得咁市正嘅咩，平時自己都係着陳年毒T同埋運動褲周圍走，黑澤就咁着件白T牛仔褲都好似識發光咁，睇到佢呆咗咁。

「阿清，我送你去巴士站？」
「哦，好......」

落樓個陣黑澤家姐同黑澤媽媽係梳化唔知傾緊乜嘢，見到黑澤同安達落樓佢哋都笑住同佢哋揮手。
「bye bye阿清，下次要再嚟搵姐姐玩呀～」
「呀，好呀，bye bye auntie ，bye bye姐姐，今日好多謝你哋呀。」

夜晚嘅屋苑無咩人，安達跟住黑澤落樓行去巴士站。山上面嘅風比較涼，清冷白燈照住紙皮石長廊好似入咗迷宮咁，耳邊只係有風吹過樹葉嘅沙沙聲同埋偶爾嘅蟬鳴，如果唔係跟住黑澤就好似有啲似恐怖片嘅開場咁。

「硬係覺得咁靜英英有啲恐怖......」自己嚇自己到一身冷汗嘅安達一路搓住手一路周圍望。
「係咩？我都慣咗補習到夜媽媽自己一個返黎架啦，唔緊要嘅，下次都送你搭車咪唔使驚囉。」
「唔，哦......」

山邊嘅巴士站得兩張鐵凳同簡單嘅簷篷連燈都無，佢哋撳着個電話用微亮嘅mon照住巴士站牌睇緊下班車幾點到。
唔知係因為山腰太凍定係日曬雨淋嘅巴士牌退晒色睇唔清楚，安達越貼越埋，幾乎同黑澤頭貼頭咁。黑澤hi到安達微涼嘅手就除咗佢被住嘅牛仔褸塞俾安達着。

「點好意思呀，黑澤你留返自己着啦，我呢啲人凍病咗無咩所謂啦。」安達唔好意思咁想除返塞返比黑澤，點知黑澤死都唔肯接。

「唔得，我應承你媽咪要睇住你架嘛。」
係遠處昏黃嘅街燈下面，黑澤嘅笑容好似特別耀眼咁，安達唔知係咪自己太眼瞓個腦開始郁唔到，好想返屋企攤上床訓覺。

係呢個時候，尾班巴士係斜路底踩行油飛上山，黑澤就即刻截住部車推咗反應唔切嘅安達上車。

「聽日見啦，遲啲先還俾我啦，記得唔好坐過站呀。」「哦...bye bye。」
黑澤目送巴士開走之後先慢慢行返屋企，係十月嘅秋風入面忍唔住打咗個乞嚏。

在車上坐定嘅安達，從書包到拿出打咗結嘅3.5mm耳機線，每次喬得好地地嘅線都會變成冷球，安達好有耐性甘解開，之後塞在耳仔，耳機甘岩播到《星晴》。

『一步兩步三步四步望著天上星星，一顆兩顆三顆四顆連成線…』

安達嘅思緒隨住佢望住天邊，越過夜空閃爍的星星，飄向今日同黑澤相處嘅經過。其實除咗拓植屋企，黑澤屋企係佢人生第二次去同學屋企。但黑澤家姐嘅告知，宜家得佢一個上過黑澤屋企。原來，以往被眾人圍繞嘅黑澤，比想象中更孤獨。佢摸上身上嘅牛仔褸，聞到對方家常用嘅洗衣劑味，件衫對佢來講略寬鬆，但帶比你嘅男友力會安心到爆棚，如果比黑澤鐘意上嘅人一定好幸福。

無人嘅車廂，安達輕輕地哼著星晴。
「手牽手　一步兩步三步四步　望著天
看星星　一顆兩顆三顆四顆　連成線
背對背默默許下心願
看遠方的星如果聽的見…它一定實現。」

在12點之前安達總算返到屋企。佢快快手衝咗個涼，將放在客廳嘅書包同黑澤件褸帶翻入房，佢將件褸搭咗在張櫈到，無奈甘搖醒細佬，推住半夢半醒嘅佢返房後，執起細佬撇喺地下嘅漫畫擺返入櫃，又求其塞啲書落書包。

『我係唔係應該都要開始睇返啲原裝英文呢?定係可以問問黑澤。』
『甘會好麻煩到對方甘。』
『聽日過埋個禮拜五再算。』就係甘癱在張床嘅安達慢慢就訓著咗。
…
「起身啦，阿哥。」安達阿媽望住安達訓到流曬口水，連兩個鬧鐘都叫唔醒佢，睇來琴晚真係溫書溫得好勤力。
「阿? 唔，早上啦。」未訓醒嘅安達慢吞吞甘坐直，眼都未打開曬，自覺用手背抹咗下自己口水。
「爛訓豬唔好賴床下，出來食早餐。你細佬今日仲早起過你啊。」安達媽媽走出房門。
呆坐咗5分鐘嘅安達總算擘大眼，但發現張櫈件褸唔見咗，依下佢真係醒曬啦!
「媽咪啊，件褸呢?」

「洗咗囉。」
「下?洗咗???」安達跑出房。
「係啊，洗乾淨比返優一嘛，仔你梳返好你後尾枕pat毛啦，人地優一讀書甘叻，多啲同佢學野啦。」安達媽回憶返家長日嚮頒獎台到拿獎嘅黑澤，阿仔識到優一真係執到。
安達刷完牙望咗下個鐘，已經無時間再聽教跑返入房著衫，求其check咗書包拿拿林孭好，9秒9跑出來叨住媽子整嘅三文治，正想衝出門落街搭巴士咬包，阿媽交咗個飯袋比佢之餘仲塞咗個蛋糕盒比安達。
「琴晚整咗戚風蛋糕，記得請黑澤食多謝返佢噢。」
事實上佢地琴晚關係都算互惠互利，佢教我，我畫野比佢，不過人地有留食飯甘。
「甘我有沒得食架?」安達勾起個飯袋揸住口塊包，接住個盒。
「你地一齊食咪得囉。」安達一諗到要同風頭躉嚮學校食野，佢應該會被圍剿。
「媽咪阿，我想自己一個食。」
「返學啦，唔好遲到啦。」媽子就甘無情地閂埋道閘。

拿住蛋糕盒嘅安達落車之後過左個馬路，就見到黑澤企嚮棵樹下無入到校門。朝早嘅陽光和藹甘輕撫著少年嘅髮絲，少年體貼地回應每個主動同佢打招呼嘅學生，成個畫面可列為今屆豐川一道最青春嘅風景線。

「阿清!」黑澤發現到佢嘅目標，笑容多返份親切來迎接被師弟妹望到有啲尷尬嘅安達。
「早…早晨，黑澤。」
「早晨，啊清，你琴日大頭蝦漏左拿你嘅架生同畫筒啊。」
「下?乜我唔記得咗拿咩。」琴日為左趕尾班車好似真係唔記得咗。
黑澤除低個畫筒，跟住細心甘幫安達孭返。
「咦，你今日帶咗個盒嘅?」黑澤見到安達有啲緊張甘拎住個盒。
「哦哦哦，係啊係啊，媽咪話整比你食嫁，佢整戚風蛋糕好叻，話要多謝你琴晚請我去你屋企。」安達交個盒比黑澤。
「嘩，Auntie甘好嘅。甘，我唔客氣啦?同我多謝返佢啊。不如入返學校先。」黑澤就同安達並排甘行上學校樓梯。

「嗯，我媽佢好鐘意你阿。」安達講依句都有啲唔好意思，於是佢扯左下書包嘅孭帶，從背脊拉上個書包再放手，聽到啲書隨住離心力跌返落來嘅整齊聲，如同佢想降低自己嘅緊張感。
「Auntie整嘅蛋糕甘大件，不如我地今日一齊lunch，食完飯再share件cake?」黑澤拍一拍安達個脖頭。
「啊?」安達抬頭望住黑澤。
「約咗人?」安達睇得出黑澤個眼神完全就係你唔應承我我會lur地。
「沒，我…同個飯frd講下今日唔一齊食應該ok。」sorry拓植，今日我有約。
「就甘話啦。」黑澤露出絕對係閃爆操場嘅男神笑容。
安達好清楚甘聽到坐曬在bench啲女仔對住校草嘅笑而全場倒吸一口氣嘅聲。

「黑澤，上班房傾下陸運會啲野。」跟住安達望住黑澤被黃社committee拉走咗，而佢捱住被全世界注視嘅目光，確定都係返VA房到提早放返啲架生。

跟住成個早上見到黑澤嘅時間就係轉堂換位沒乜對話。除咗core，選修堂都佔好大比重。而今日早會閱讀堂結束後，安達就收到份通告。上面係甘寫嘅，為咗響應公益金嘅支持，除左會搞班際捐款，活動嘅重頭戲就係便服日!全世界可以著自己嘅便服翻學校。對於青春期同學仔來講，依個係一個難得拋開公式，展現自身魅力來吸偶，無論男女都爭妍鬥麗嘅日子，考試週結束後一日就係啦。

認真安達就別無所求，以前join便服日嘅佢唔係穿校服，就係求其穿tee同牛仔褲。安達填返自己個名，寫返會捐20蚊，跟手就折好張通告塞返落file。

「安達，今年著咩?」拓植趁小息嘅時候同安達吹水。
「吓，咪又係毒tee加褲囉。」
「你可唔可以唔好甘毒?我借件褸過你啦!我買咗件好型嘅皮褸!」
「洗唔洗甘大禮啊，留反比你自己啦。」
「有沒搞錯阿，一齊做mk仔啦今年。」

Aki_Yuki:
「唔係做mk仔就溝到女囉。」安達翻白眼。
「唔試下點知哦。十卜下巴打啦，就甘決定啦!」以前好文青嘅拓植最近唔知係唔係著左反叛期嘅綠燈甘啦，異常地鐘意mk仔個文化，同佢send短信嘅時候係要打埋啲外星文。

『牙清!尒份中文notes寫巧未牙，禾巧橙啊，典解禾屙肚刀冇人關針禾-_-||，禾巧需要尒份碌屎牙! 聽朝俾禾啦。by巧威威嘅人哥*♡』

「唉好啦好啦，你拿來我咪穿囉。係啦我今日唔join你飯。」
「巧啊巧啊，咦，你有女溝啊?」
「乜有女，沒啊。最近幫個社畫畫甘，lunch有啲野做甘囉。」安達沒講出個實情，不過其實都預咗會傾返副畫甘。
「好啊，夜啲再搵你。」拓植拉埋人落水就已經滿足，所以巴打口是心非，反正有戀愛煩惱嘅時候咪又係會同佢講，又唔差在依個時候要知。

小息先得個10分鐘，眨吓眼就完咗。Lunch之前就係中文連堂。雖然比起英文同數學，中文已經係安達比較有興趣嘅一科，但係琴日咁夜先返屋企，今日啊sir仲講到明教文言文，真係聽到都已經想訓。
「上堂啦各位同學拎書出嚟啦，31頁，快手啦一陣教唔唒又要遲放lunch㗎啦」
本身大家仲慢條斯理咁唔願行反位，一聽到啊sir咁講嘢，個個都即刻行反埋去拎本書出嚟。而安達都即刻烏低身摷吓個書包。點知又摷極都見唔到本書喎。oh shit..唔通係琴日唔記得放入書包?啊sir已經開始講緊書啦…佢再望一望個櫃桶，又偷偷地行去後面locker搵，點知都係冇。今次真係仆街啦。正當安達想行反埋位個陣仲比啊sir見到。
「喂安達你搞咩呀無端端出位」
「唔係呀⋯啊sir對唔住⋯我唔記得帶書」

「點啊琴日咪提左你哋帶囉？叫你哋好似小學生咁寫埋落手冊到㗎啦喎，咁都唔記得」
而家全班都另轉頭望實安達，真係搞到佢周身唔聚財。安達太緊張又唔知點應啊sir，成個人棟左係到面都紅晒。
「啊sir唔好嬲，咁岩安達隔離位冇反，我坐過去同佢一齊睇咪得囉」
呢個時候黑澤把聲好似救世主咁打破咗呢一刻嘅尷尬空氣。黑澤拎埋本書就企起身行去locker前面拖返安達埋位。
「搞掂啦啊sir你繼續講啦」
好彩啊sir都因為要趕進度冇再糾纏落去。頭先個種尷尬氛圍對安達黎講仲有啲餘韻。可能係見安達個樣仲好緊張，黑澤突然之間哄埋去佢耳仔邊，用氣音勁細聲問佢有冇事。
「你冇嘢呀嘛，唔使驚喎，陳sir嬲一陣就冇事」
「我冇嘢啊⋯」
安達都唯有用反氣音應佢。

「係咪我琴日太夜放你走你反到去唔記得執書包啊？對唔住呀⋯」
「痴線唔慣你事啦，我自己唔記得咗姐⋯」
「唉下次都係唔好咁夜放你返屋企」
「都話唔慣事囉⋯」
「咁下次你係我屋企訓埋就一定記得帶，我可以拎我家姐以前個本書比你」
「唔係咁好嘅⋯」
「係呢我哋一陣間⋯」
「喂！點呀黑澤！叫你哋一齊睇書唔係畀你哋傾計㗎」
突然間畀啊sir叫名，佢哋兩個都嚇到即刻坐反直。雖然係用氣音講嘢，但係當全班都靜哂只有呀sir中氣十足咁講嘢嘅時候，佢哋係後面撕撕沙沙其實都幾明顯。
「sorry呀，係我頭先有一句聽唔切你講咩我問反安達咋，冇下次冇下次」

唔知點解黑澤好似應付慣唒呢啲場面咁。比著係安達除咗對唔住之外真係唔知講咩好。安達整理好心情，準備認真聽書嘅時候，隻手又無端端feel到有人sip咗張紙仔比自己。安達就打開咗望下，入面有一行字。
——一陣去邊度食lunch好?
安達望完又昂高頭望下黑澤，佢又好認真咁聽書抄緊notes。係咪應該要應反佢？安達都拎起咗支筆。
——班房lor
佢接反埋sip反畀黑澤，之後佢就見到黑澤毫無表情咁拎咗。過咗一陣又陰陰嘴笑咁sip反畀自己。
——班房會畀好多人圍住㗎，我平時都唔會係班房食T_T不如我哋偷偷地去art room？
——都可以
——一陣一落堂我哋就要沖出班房
——好

安達本身真係以為黑澤9up下only。食個Lunch者搞到好似屍殺列車咁要夾好timing跑係咩料。勢估唔到，安達實在係太睇少校草嘅威力。啊sir今日遲咗少少放lunch，透過個窗已經睇到班房出面成班女拎住個飯盒企係度。其實安達一直都知佢哋係等黑澤，但係唔知原來佢哋會瘋狂到咁。啊sir一打開個班房門口，成班女好似書展開幕第一日搶寫真集個啲人咁跑入嚟圍住唒黑澤。成個班房瞬間勁多把女人姣婆聲係咁問黑澤不如一齊食飯呀、我整咗飯盒畀你呀。
「哈哈唔好意思呀咁多位我今日有野做」
「下～～～～唔好啦黑澤～～」
黑澤艱難咁係書包到拎個飯盒出嚟，然後就叫左安達一聲。安達都好醒水即刻拎埋個飯袋連蛋糕，穿過班女行去黑澤隔離。
「下安達～～？你幾時同黑澤咁frd㗎」
「咪就係！平時都唔見你會同黑澤食」
「唔係⋯！我哋其實⋯」

安達畀啲女圍到口塞塞，一諗到黑澤竟然咁多年嚟每個lunch都要應付呢班女都幾可憐。不過無幾耐，佢就feel到黑澤拖住咗自己個手腕，同班女講咗一句「係咁先啦」就開始衝出班房向前跑。一路聽住後面班女嘅哀號聲，安達另轉頭仲見到有幾條女想追過黎。奈何校草腿太長，連安達只係矮佢幾cm都要出盡九牛二虎之力先至跟得上佢嘅速度。佢哋由4樓走廊跑去樓梯之後就摩打腳咁連環落到地下個層，然後即刻衝入Art room就刪埋門。
「頂⋯哈啊⋯哈啊⋯哈啊⋯你跑得好快啊⋯」安達一邊咁住個左下腹一邊抖大氣。真係冇expect過食個飯都要走難囉。
「sorry啊⋯你有冇事呀」反而黑澤好似當頭先只係散步咁完全冇喘氣，仲拎左自己個水樽遞畀安達。「駛唔駛飲啖水？」

安達唔理三七廿一即刻拎咗黎灌咗兩大啖入口，之後先抖順條氣，同黑澤搵張枱坐底就開始食飯。諗起頭先班女咁猖狂，安達都忍唔住問吓黑澤平時佢點搞。
「你每次lunch都係咁㗎？唔怪之得冇見過你係班房食啦」
「ok啦，主要係我冇一個特定同我一齊食飯嘅friend⋯我都明嘅，其他人食飯見到我身邊成班女仔，呃sor啊我唔係曬命，不過你明啦⋯正常都唔會想同我一齊食嘅⋯唉⋯今日仲要你同我偷偷摸摸咁」
真係估唔到，連安達自己都有柘植呢個飯友，識咁多人嘅萬人迷黑澤竟然係會一個都冇。之前佢媽咪又話自己係佢第一個帶反屋企嘅人。安達唔識佢個陣仲覺得佢係人生勝利組，要乜有乜，應該都冇咩好煩惱。結果原來靚仔都會有一啲佢自己先會承受嘅壓力，仲要冇得同人講，如果唔係就好似同人曬命咁。諗諗吓安達都覺得佢有啲慘。

「咁⋯以後我哋一齊食囉，我問下我個frd柘植睇吓佢肯唔肯」
「真係㗎？」
「嗯，咁你咪唔使成日畀啲女仔搞到食唔到飯囉。不過我同你講明先柘植佢係mk仔黎。」
「冇所謂啦哈哈哈，好開心呀安達竟然介紹朋友仔畀我識」
見到黑澤好驚訝然後好開心嘅樣子，唔知點解安達都好有滿足感。原來好似佢呢啲小薯仔都有野可以幫到黑澤。
見大家都食得七七八八，安達就拎埋個戚風蛋糕出嚟，叫黑澤試吓味。
「嘩～Auntie好勁呀⋯真係超好味喎，好似係出面買咁」
「我媽咪最叻就係整呢個㗎啦」安達都用叉刮咗一啖嚟食。
「係呢，個banner啲稿點啊？」
「Ok啊佢哋都話你畫得好靚呀！不過有幾個人今朝要抄功課冇嚟到傾，所以我哋諗住一陣放學再開多次會」
「喔⋯咁你哋開完再同我講啦，希望可以下個禮拜搞掂啦」

「係呢安達⋯你介唔介意畀你手機號碼我？咁我放咗學之後都可以搵到你⋯一齊整banner好似方便啲」
「喔好啊」
然後佢哋就各自係褲袋度摷左自己部手機出嚟。雖然遲過黑澤少少發現，但係安達終於知道咗原來佢同黑澤都係用緊同一款手機。
「你都用緊w800i?」
「係呀其實你之前同媽咪傾電話嗰陣我就發現咗」
「又會咁啱嘅，我仲以為你會用nokia個mon可以360度旋轉個啲貴野添」
「痴線啦點會輪到我呀，我媽咪就用緊，我同家姐都係用呢部」
「喔⋯仲以為你係少爺仔添」
「梗係唔係啦，你以為我係個啲出世就係為咗同親戚爭身家然後第時要繼承老豆公司個啲有錢仔身世啊？」
「⋯你唔係咩⋯」
「救命哈哈哈哈」

katieleung1206:
安達好耐都冇試過同柘植以外嘅人食飯食得咁開心啦。佢哋交換完電話之後，就一齊打開咗手機自帶嘅俄羅斯方塊，係完全無人嘅art room玩到打鐘為止。

拋反便服日當眾還褸個波比小雅子

自從嗰日安達同黑澤一齊食完飯之後佢哋就friend左好多。不過黑澤因為會間中比人拉去處理社務，所以佢哋都唔係成日得閒一齊食飯。甚至有時到左放學，黑澤都仲係要留低做嘢。不過就算好忙，黑澤每日都係會send下sms比安達。

---你今日溫書溫成點啊 ^-^ 有冇咩唔識？我可以教你喎(｡ì _ í｡)

--- Ok啊，多得你嗰次幫我溫書咋( ^ω^ )

---太好啦(｡ì _ í｡) 你要繼續加油呀！

---嗯。

---真係希望可以快啲考完試呀！到時冇咁忙我哋又可以多啲時間一齊食飯啦o(≧v≦)o

---好啊！到時候我再叫阿媽整個蛋糕先！

---哇！好期待啊！

---我都差唔多要瞓啦。早抖啦黑澤。

---好啦！咁聽日學校見啦 (>_<)

「細佬啊，你知唔知你阿哥最近係咪拍拖啊？」

「下？鬼知啊？」

「你阿哥最近電話費貴左好多啊，張單話佢send左好多 sms喎。」

「哦，咁又係喎。我成日見佢夜晚晚唔瞓係度玩佢部電話。」

「嗯...」媽媽心諗：搵日要chok下阿哥先得。

時間過得好快，話咁快今日就係考試最後一日啦。咁終於考完試，黑澤當然又理所當然地比人拉左去搞社務。安達有時候會心諗其實社務係咪真係咁忙啊？係你班女想見多黑澤幾面咋？

「Yo，牙清，你聽日便服日諗好著咩未啊？」你的Mk仔巧威威人哥已上線。

「我咪話左會hea著tee同褲囉...」安達都唔明點解拓植...啊唔係，係人哥先啱，會咁緊張便服日嘅。講真啊，如果唔係怕唔合群，佢真係寧願著番校服啊。便服日呢家野，著得hea又比人話你hea，著得隆重啲又比人話你浮跨，真係麻鬼煩。

「你唔好咁hea啦！咁hea你會成世都溝唔到女架！」

「咁你宜家mk又溝到女啦咩？」安達忍唔住反白眼：「就算溝到，你咪又係溝番個mk妹番黎？鹹濕小陣啦你！」

「挑！宜家mk妹好失禮你咩？佢哋不知幾索啊！正所謂男人唔鹹，女人點濕...」

「得得得，你中意就得啦下。」安達決定打斷人哥發表佢嘅文學巨著。

「拿，咪話人哥唔照住你啊下！」柘植大大力兜野拍左安達一下：「我之前應承左借件皮褸比你唔會走你數嘅！拿，你因間嚟我屋企攞啦！」

「唔要，你留番自己著啦下啊人哥。」

「乜你咁架？都唔巧玩嘅？」個話題又開始兜番轉頭：「唔得！禾因間要去你屋企幫你揀衫先得！」

「唉你中意啦。」安達有預感巧威威人哥唔會就咁放棄。

就係咁，今日放左學之後柘植就跟左安達番屋企。

「咦，柘植？好耐冇見你黎我地屋企玩啦喎！」安達媽媽開門迎接佢地。「你哋考完試可以慢慢玩啦！」

「係啊Auntie！」柘植雖然已經進化成為mk仔，不過對住長輩佢都仲識咩叫禮貌嘅：「我今日係黎幫安達揀聽日便服日要著嘅衫架！」

「哦，咁就麻煩你照顧呢個傻仔啦！」安達媽媽好滿意咁點點頭：「你快啲幫我執正啲佢啦！佢成日都著到咁hea。」

「拿，都話左你架啦！」柘植有安達媽媽撐腰表示得戚。

「阿仔啊，你快啲去廚房沖杯茶招呼下人地先啦！」

「下？你去啦～」

「而家你係咪唔聽阿媽話啊下？」

「係～嘅～」安達有啲無奈咁入左廚房。

「係呢，拓植啊，Auntie 有啲嘢想問你呀。」

「咩事呀？」 「無～我想問你呢，你知唔知阿仔佢最近有冇識咗啲咩女仔朋友啊？」

「女仔朋友？冇啊，佢最近都係成日同我一齊食飯咋嘛，最多咪多左我地個同班同學黑澤。」柘植心諗安達條友咁毒鬼識到女仔。

「真係冇？你唔好呃Auntie 喎～」

「真係冇喎...」

「哇，柘植你做咩同我阿媽咁好傾嘅？」安達捧住兩杯茶由廚房行返出嚟。

「Errrr....」

「哎呀，好啦，我唔阻你哋慢慢玩啦，我都係出去買餸先！」安達媽媽話：「柘植你今晚留低食飯啦下。」

阿媽走左之後安達同柘植入左房。

「好，等人哥睇下你個衣櫃先～」柘植打開咗安達個衣櫃：「咦？呢件牛仔褸靚野黎喎！」

「牛仔褸？我邊有啲咁嘅嘢啊？」安達望一望個衣櫃入面。佢見到阿媽幫佢掛起左黑澤件牛仔褸，入面仲要掛埋佢件T-shirt ：「係喎！我唔記得要還返件褸比黑澤添！我聽日還返俾佢先！」

okatsu: 「哇，掛到咁樣樣嘅？」柘植樣衰衰咁又唔知諗緊乜。

「點樣樣啊又。」

「黑澤件衫攬住你件衫呀～巧sweet sweet～～」

「妖！」

安達急急腳係柘植手中搶走件牛仔褸塞返落書包度，柘植就拎晒安達啲衫鋪係床上面仔細端倪。
「嘩阿清你啲taste真係呢，auntie頭先仲叫我要幫你執正啲，大個仔啲添呀。」
安達望住呢幾個月突然沉迷mk style嘅旺中潮人，拎起本書就縮上床度由得老友幫佢揀衫。
「是但啦，反正好似我呢啲人着啲咩都無咩人理架喇，你幫我求其揀咪得囉。」
「正所謂人靠衣裝丫嘛，之前我同啲網友約出嚟見面呀，着到烚下烚下咁唔通啲人會信我係少年葉念琛咩。」
柘植又係書包度拎咗一袋戒指頸鏈出嚟塞俾安達，叫佢聽日早少少返學校互相裝下身咁。
「同埋呢，如果阿清唔陪我嘅話，我一個人着到咁好kam架嘛，求下你啦師兄！」
「唉好啦好啦，一次咁多架咋下。」

黑澤一年入面會有啲時候抗拒返學，一年一度嘅便服日係其中一個，如果可以嘅話佢直頭想著返校服返學就算，之前家姐未畢業嘅時候次次便服日都當佢換衫公仔咁幫佢襯衫，今年佢終於可以鬆一口氣。
打開個衣櫃諗住求其拎套方便活動嘅衫出嚟聽日著個陣，安達較早之前嘅sms係佢嘅腦海彈咗出嚟。
『比我個fd捉住聽日話要著靚仔啲，好淆呀>< 黑澤諗住著咩？』
『我都係求其着㗎咋』
『好似黑澤咁樣嘅人肯定着咩都好睇啦哈哈』

然後黑澤係自己唔知嘅時候攤咗幾套衫係床上面沉思，連家姐敲咗幾下門之後竄咗入嚟都察覺唔到。

「優一呀，便服日啫唔駛拎埋做表哥伴郎件三件頭西裝出嚟掛，估唔到我細佬竟然都會有想搶風頭嘅一日呀下～」
「喂！家姐你又唔敲門就入嚟！」
「我有呀，你掛住揀衫聽唔到咋。」家姐三兩步就揭開黑澤急忙遮住啲衫嘅被，將佢件西裝掛返入衣櫃，又拎咗幾件衫出嚟係黑澤身上左拼右拼，最後掉到一床都係衫都仲未決定好。
「唔，我諗嚟諗去都係覺得你咁着最好。個日連阿清都望到你眼瞏瞏咁，實無死啦。係喎，我送比你件牛仔褸呢？」
「你無啦啦又提阿清做咩呀......件褸個日凍凍地我咪借咗比阿清囉。」
「哦～哎呀如果襯埋就fit晒啦，男仔都望實你今次仲唔冧死女？」家姐向佢單一單眼就呵呵大笑返咗自己房。
黑澤望住床上面嘅白T同埋牛仔褲，搵咗件開胸冷衫出嚟襯就摺好放咗係書枱上面。

便服日同平日嘅朝早冇咩唔同，黑澤返學總係會早過其他人，可能會搵老師傾下嘢或者係學校門口派下傳單咁，佢係空寥寥嘅班房擺低個書包個陣唔覺意望下安達個位，當然同平時一樣只係得張空凳，有一刻佢竟然期待安達會推門入黎然後就可以見到佢口中話着靚啲嘅樣。回想番起又好似無安達著校服以外嘅回憶，勉強講嘅話都有嘅，有一次安達比老師叫出去黑板做數個陣，見到佢係薄薄地嘅校服恤衫透出咗件當底衫嘅比卡超t恤真係忍唔住笑咗出嚟。

同學生會一齊拎住公益金錢箱係學校門口呼籲同學捐款，黑澤露出敷衍嘅笑容同捐咗錢嘅同學仔影相，一直都心不在焉係咁望實學校門口條斜路，佢唔知道呢種十五十六嘅感覺到底係乜嘢，可能只係最近咩都會同佢講嘅安達故弄玄虛令到佢好奇心過剩，又或者係講起便服日要着得靚仔啲所以黑澤特登gel咗頭掛。
結果由七點三望到八點三，仲有十分鐘就打鐘，完全無見到疑似安達嘅身影，唔通安達今日請病假？仲諗住睇下佢着咩衫番嚟添，黑澤有啲低落咁執好嘢行返課室個陣，突然見到班房門口一陣騷動，佢無咩心機應酬想睇佢便服嘅粉絲就依依哦哦攝咗入班房。

大半班同學都聚集咗係窗邊嘅位置，密質質咁唔知發生咩事。

見到黑澤入咗班房，人群稍微散開，佢見到一個著住黑色皮褸，帶住銀戒指同頸鏈，頭髮向後梳起咗，但係面都紅晒紅到上頸嘅背影。

黑澤有偷偷地想像過安達私底下會着啲咩，可能係電車男格仔恤衫配個鋼鍊斜孭袋，又或者係乖乖仔恤衫襯件冷衫，但係粗獷嘅mk皮褸着到成個band友咁真係從來冇諗過，乜原來怕怕醜醜嘅安達私底下係咁樣嘅咩，真係估佢唔到。

安達擰轉面向佢揮揮手笑咗一下。
耳邊同學講嘢嘅吱吱喳喳，秋風吹起百葉簾嘅沙沙聲，咁啱響起第一堂嘅鐘聲都好似突然靜止咗咁，安達係晨光入面柔和嘅笑容同佢嘅衣著好唔夾，但係黑澤呢一刻無諗到咁多。
平時纏住佢嘅幾個女同學都係安達隔離逗佢講嘢，本來應該鬆一口氣嘅黑澤唔知點解個心噏住噏住咁，原來佢有少少妒忌安達搶咗自己風頭？又唔係呀，今朝應該全校都睇到晒自己着咩便服啦，定係佢有啲嬲安達收收埋埋冇比佢睇自己着啲咩？

佢hang咗機好似幾分鐘咁長咁嘅幾秒，先揮揮手回應返安達，直到老師開門行入班房先返埋位坐低。

「喂，達仔睇唔出你深藏不露喎」「係囉係囉，平時都唔見阿清著得咁潮嘅。」

係囉，平時又唔見你哋懶熟咁叫阿清，乜你哋見唔到阿清個樣幾尷尬咩。

上core之後就係轉堂，換班房嘅時間，其實分咗科之後佢哋可以一齊上堂嘅機會好少。

黑澤好想問下安達今日點解會著到咁嘅，但係小息又被班主任捉咗出去傾嘢，都未有機會可以同又比同學仔圍住嘅安達傾到兩句，於是轉堂果陣黑澤只係見到安達捧住疊書同柘植一齊上中lit嘅背影，見到set到個頭成隻箭豬，係條窩釘褲掛到聖誕樹咁嘅柘植，黑澤好似明白咗啲乜嘢。

安達經過班房門口個陣望住黑澤好似有啲咩想講咁，但係老師已經到咗，安達惟有急急腳趕上堂。

係返自己班房上econ個陣，黑澤攝咗張紙條係安達櫃桶度，順便抄低安達貼係枱面嘅時間表。
『今日art room一齊食lunch？嗌埋大文豪？』

過咗個小息張紙條唔知點解返番去黑澤嘅櫃桶度。
『唔啦，我哋一齊出街食啦，有啲嘢比你。班房等』

lunch之前嘅最後一堂咁啱係班主任教嘅中文堂，今日安達嘅隔離位有返學，佢又乖乖地帶返本中文書，所以黑澤都係好似平時咁間唔時偷望下佢，同時佢亦都感受到安達望咗佢幾下，到底安達今日做咩事神神祕祕咁呢？

係落堂之前三個字，阿sir宣布難得今日係便服日就叫全班企係黑板前面影返張大合照。
雖然基於校規要強行著返對legging，冇放棄到著熱褲同短裙嘅女仔係咁逼嚟逼去想黑澤企係正中間，阿sir嬲嬲地就一聲令下要所有人跟返身高嚟排，生得比較高嘅黑澤同安達自然就企咗係最後排挨係黑板前面。

影完兩張相之後仲有啲時間阿sir提早鬆人就由得佢哋自由活動下，企係黑板前面嘅幾個同學仔開始做埋啲鳩嘢，畫下黑板叫個同學企埋去影相咁，趁啲同學掛住玩個陣黑澤終於捉到機會企埋一邊同安達講兩句。

「安達，對dr mar幾襯你喎，估唔到你私底下會着呢啲style。」
「係咩，套衫柘植借比我夾我著架咋，黑澤都著得好好睇呀。」

「我都係好似平時咁着啫，係呢，一陣我哋去食咩好......呀、」

說時遲那時快，係度嬉鬧嘅同學唔知幾時就喺度掟粉筆粉刷，啪一聲就唔小心一嘢掟咗落黑澤度，係佢件深藍色冷衫度拍咗大大個嘅粉印。
黑澤無嬲，只係無奈咁嘆咗口氣叫班同學下次小心啲，就除咗件衫落嚟嘗試拍走啲五顏六色嘅粉。

嬲嘅反而係安達。係度玩嘅人見到黑澤無發火就鬆咗一口氣繼續嘻嘻哈哈，但係一啲都無諗住埋嚟關心下咁，仲有幾個人企埋一邊陰陰嘴笑添。反而係啲女仔就好熱心咁又拎水又拎紙巾幫手抹，可惜越幫越忙就抹大咗撻漬咁。

安達嬲嬲地就衝返埋自己位，打開書包拎咗黑澤件褸出嚟塞俾佢。
「唔好抹啦，我洗乾淨咗你件褸，還返比你吖。」
「阿清，多謝你呀。」黑澤即刻接過件牛仔褸著返上身，圍住佢嘅一班女仔即刻有理無理起哄嗌左先，
無計啦，黑澤着褸個樣咁型棍個look又咁襯佢，仲有仲有黑澤同宅男達幾時咁熟嘅？阿清阿清咁嗌人，安達今日又突然轉look變咗mk型男，上堂果陣多個靚仔可以欣賞真係人都醒神啲啦係咪先。

係呢個時候lunch time鐘聲響起，黑澤同安達對望一眼就掉低身後嘅女同學衝咗出班房。
其實一直以來黑澤都覺得安達身上有陣香味，但係唔似止汗劑又唔似洗衣粉味咁，係柘植件皮褸嘅皮味入面隱約都聞到呢陣味，係黑澤自己件褸都係佢哋奔跑嘅過程而打開咗一啲嘅時候，佢終於諗到係自己身上谷出嚟個陣johnsons baby 藍色沐浴露味點解咁熟面口。

shuk730
「所以呢，就係因為咁個日你兩個掉低我一個自己走去食飯？今朝又唔等埋我搭校巴嚟運動場？」
柘植同安達縮咗係運動場看台嘅最高處，一邊咬包一邊望住下面黃社區域嗌口號嗌到走音好激動嘅黑澤社長。
「咁比啲女圍住搵唔切你呀嘛，同埋一樣還一樣，今朝我做mark分要早啲報到，黑澤話佢daddy可以車埋我又揸到架車嚟我樓下，拒絕人好無禮貌架嘛......」
「早知尋晚嚟你度訓啦有順風車搭咁好。」

安達心諗，今朝不知幾尷尬呀我你唔知咋。

Johnson’s baby味牛仔褸🤪

oxygen2sai:

（因詢眾要求寫埋搭daddy順風車部分）

訓到矇矇鬆鬆嘅安達一朝早就比電話嘈醒，見到係黑澤嘅電話佢仲未load到係咩事就聽咗。
「喂......黑澤？」
「喂，阿清？你啱啱醒？早晨呀，我同daddy出車啦，半個鐘之後你樓下等？停車場上得客架可？」
「唔係呀！我醒咗架啦！陣間見啦，幫我多謝uncle喎。」
「我會架啦，陣間見啦。」

安達傾完電話先真正清醒，即刻衝落床梳洗換衫準備出門口，迎接一年一度嘅陸運會。差啲就唔記得左尋日放學個陣同黑澤講起自己今日幫手做工作人員要搭早班校巴去運動場準備，講下講下唔知點解就應承咗搭黑澤順風車。

「咁樣就得啦，張banner聽朝早committee會call車車晒啲物資去運動場。」
安達係操場睇住黑澤同社員攤開佢哋合力完成嘅banner同埋社旗，最後測試咗組裝效果之後佢哋就將要用嘅物資都pack箱準備聽朝集合。

平時安達都無咩理過自己個社嘅嘢，只係係陸運水運個陣贏到比賽先拍下手掌咁。比黑澤拉咗去幫社委之後先知，其實係一班有熱情嘅人全年都係度努力咁做緊啲嘢出嚟。

黑澤拎住張密密麻麻嘅賽事表同人名表念念有詞，話係聽日嘅參賽名單，但係有幾個學界好手仲未肯落場參賽，準備要逐個去遊說咁話。

安達突然覺得以前社長逐班嗌人參賽自己耍手擰頭好似有啲衰仔咁，於是佢求其認投咗個100米預賽，黑澤好激動咁捉住佢對手話啦啦隊同埋自己一定會畀心機幫佢打氣。

「咁又唔使嘅，好似我呢啲人都係陪跑嘅啫，旨在參與下......」
「唔係架，所有社員我哋都會畀心機幫佢加油架，要有信心呀安達！」
「哦......好啦。」

「係呢，安達聽日點去運動場？」
「我應該返學校搭第一班校巴去掛，今年做helper要早啲到場briefing。」
「咁呀，不如我叫daddy車埋你？反正都順路，briefing會我都要開呀，同埋我又要早過committee到場幫手接貨同set場。」
「唔好意思咁麻煩你嘅...」
「唔麻煩呀，就咁話啦？好唔好？聽朝我call你？」

頂唔住黑澤閃閃發光嘅誠懇眼神，安達都係點咗頭。
「哦，哦...好啦。」

黑澤啱啱打嚟話兩分鐘後到。

安達企係停車場緊張咁望嚟望去，陣間同uncle點打招呼好呢，之前去黑澤屋企一櫃都係獎盃同獎狀咁又年年考第一，只係中遊普通人，最盡都係拎下藝術獎學金嘅安達開始擔心介紹自己兩句，uncle就開始皺眉頭咁點算好，揸住背囊孭帶嘅手都開始標冷汗。

黑澤話佢daddy揸架黑色車，車牌係......等陣先，佢今日要坐嘅車就係而家駛緊埋嚟嘅大大架嘅黑色benz？！

部車係安達面前停定，着咗社長制服嘅黑澤撳低車窗向佢揮手，開咗車門比安達上車。

「早晨呀阿清，daddy，呢個就係我同班同學安達清。」
「uuuncle早晨，我係安達，今日真係麻煩晒你咁早過嚟，唔該晒。」

見到陌生人尤其係長輩就硬晒軚嘅安達跨過黑澤坐係佢隔離，黑澤笑笑口咁幫佢除背囊又幫佢扣好安全帶，同黑澤完全一個餅印嘅黑澤daddy係倒後鏡笑住咁講。

「唔麻煩呀，平時有你陪我地細佬讀書要多謝你就真。」

兩仔爺嘅笑容都係咁耀眼，睇嚟黑澤老豆後生都係溝死女個種，等陣先我諗咩呀太失禮人啦。

安達尷尷尬尬咁回咗一個笑容，心諗你公子陪我讀書先係呀其實。悠揚嘅古典音樂係大又舒服嘅車廂響起，黑澤daddy一比油就好平穩咁開始咗佢哋嘅車程。

黑澤承認佢自己有少少私心，例如係知道安達唔會拒絕人而叫daddy車埋佢，等平時last minute先返學校嘅佢可以訓晏啲，又例如係頭先冇讓個位比安達坐，安達跨過佢嘅時候偷偷地深呼吸咗一啖安達嘅香味。

屋企架車又大又舒服，爸爸手車一直都好好。
黑澤忙咗成個月直到尋晚深夜都仲諗緊陸運會嘅事，比柔軟絨凳包住再加上身邊比安達嘅香味圍繞，

聽著安達同daddy傾計，自己偶爾搭一兩句嘴，唔知點解黑澤成個人都放鬆咗落嚟好似小朋友咁縮咗上張櫈度，部車一路行駛搖下搖下好似搖籃咁，佢嘅眼皮亦都越來越重，挨係頭枕上面久違咁無皺住眉頭墮入黑甜之中。

安達攬住自己個背囊背脊貼實座位唔敢郁。本來佢同黑澤父子一人一句咁傾緊閒計，慢慢黑澤就越嚟越細聲，直到有個毛神神嘅重量落喺安達膊頭上面仲用塊面捽咗兩下。唔知幾時黑澤瞓著咗，車外嘅陽光似乎太掁眼，佢瞇埋眼唔咗一聲就埋咗落安達膊頭度好似bb仔咁。

「黑澤？喂...」
「細佬大個咗就好少會坐坐下車瞓到咁腍，由得佢啦。」
「哦，好嘅uncle...」

安達艱難咁低頭，只係見到光曬落嚟先見到嘅淺色雀斑係頭髮間隙中間若隱若現，佢嘗試推一推黑澤但係瞓著嘅人實在太重，好似一舊石咁絲毫不動，只好由得佢繼續枕住自己訓。

優一佢呢，成日都搞到自己好攰，好似唔識休息咁，我哋都好擔心佢。
黑澤透過倒後鏡望住佢哋，又或者係望住另一個黑澤自言自語，安達其實都唔識分辨就望向窗外避開咗視線。

「所以知道優一識到個好朋友，會單純咁想出去玩下，我哋都好多謝有你肯做佢朋友照顧下佢呀。」

「uncle唔好咁講，優...黑澤佢平時係學校不知幾受歡迎呀，平時成日都好多人圍住佢，佢又朝朝都係學校門口同人打招呼，識得好多人咁嘅。」

「係咩，但係食飯都係聽優一提起你多呀，之前都未見過優一會帶人返屋企玩嘅。」
「哦...係咩，咁樣呀，哈哈。」

uncle掟咗個彎比油上橋令佢哋一齊向右跣，黑澤嘅手背呢個時候輕輕咁掂住安達放喺座位上面嘅手，太近啦，安達縮又唔係唔縮又唔係，佢好鴕鳥咁諗反正都見到運動場，好快就可以叫醒黑澤，唯有忍一忍啦。唔通係人哋老豆面前好似怕咗佢個寶貝仔彈開咁無禮貌咩。

黑澤嘅睫毛顫抖咗兩下，就好似佢指尖跳得有啲太快嘅脈搏同步咗咁。

「黑澤？黑澤？起身啦，到咗啦我哋。」

黑澤一擘大眼就見到安達係佢面前放大嘅面，扶住自己膊頭搖緊自己，訓到迷迷濛濛嘅佢開口就係帶住未醒嘅沙啞。
「嗯～早晨呀～阿清？」
「記唔記得你係邊個？我有幾多隻手指？」

黑澤好無形象咁噴笑出聲，「你係安達清，仲舉著五隻手指丫嘛，哈哈哈哈哈。」跟住佢係座位前面抽咗張紙巾抹一抹自己塊面，對住倒後鏡捽兩捽眼再梳番好個頭，頭先枕住自己訓覺，柔軟恬靜嘅優一就消失無蹤，平時精明自信嘅黑澤優一就開門落咗車。

「細佬今日比心機呀，贏多幾個牌返黎，daddy mommy遲啲同你開慶功宴呀下。」
「好，wish me luck。」黑澤嘅笑容一如以往，好似有啲苦澀咁。

安達同黑澤係路邊同黑澤daddy道別之後，朝早七點嘅運動場仲未有人開門，佢哋就去咗對面馬路嘅七仔買咗兩罐咖啡隔住玻璃望住個鐵閘。

「頭先呢，你daddy話你好辛苦好似唔識攰咁。我仲以為你daddy會係啲好嚴肅好harsh嘅人添，點知都幾好傾呀。」

黑澤捽一捽自己魂精位，握住罐咖啡係吧檯上面玩咗一陣先開口，
「daddy真係咁講？係人都會攰架啦，我都係人一個啫。」

「不過，其他人覺得黑澤姊弟就係年年考第一，咩都做得好好咁，做唔到嘅話好似會令人失望唔係咁好。」

雖然自己阿媽有時都幾長氣，但係對自己同細佬無咩要求健健康康就好，見到黑澤扁住嘴咁笑，安達聽到佢咁講突然個心拿住拿住咁，忍唔住衝口而出：

「有時我覺得你已經盡咗力做得好好架啦，攰嘅話咪挨住我膊頭休息下囉。」
「阿清，你知唔知你係度講緊乜嘢？」

枱面罐特濃咖啡比黑澤一嘢打瀉咗，急忙拎兩張紙巾踎低抹地嘅安達一臉不解咁抬頭望著佢。

（終於都完)(I mean我呢part)(等睇各位表演)

間七仔鋪頭好細，個咖啡罐跌落地下嘅聲收銀櫃果邊就梗係聽到啦，見到個學生哥論論盡盡甘抹地下，阿姐一出來見到甘大灘漬就即刻叫停安達。

「後生仔唔好抹啦，阿姨拿拖把出來吸啦。」
「喔，好啊，唔該姨姨。」

阿姐個舉動打斷咗兩個人嘅對望，視線雖然被轉移，但安達沒停低諗黑澤點解會問甘嘅野。而黑澤嘅硬頸依個時候就展現無遺，佢有少少執著甘等緊安達嘅答案。

安達唔知黑澤指嘅重點，究竟係佢話黑澤盡咗力就好好依句唔岩啊，定係作為朋友做加油站借個脖頭比佢個決定係唔係over咗。甘佢真係唔想見住好朋友孭住壓力過日子。

沉默甘望住阿姐拖地嘅兩人，等阿姐走開之後同步甘出咗聲。

「對唔住，我岩語氣重咗。」
「我唔忍心見到你甘辛苦。」

聽到安達甘回應嘅黑澤眼神多咗份光亮，就好似黑夜等來極光嘅出現，午夜嘅太陽照亮咗千里追尋奇跡嘅旅人。

「阿清，我……」

『🎶年輕得碰著誰亦能像威化般乾脆　
快活到半日也像活盡一百萬歲』
安達個手機識時響起《活在viva》，係mk仔拓植話要set嘅個鈴聲。

「等陣，比我聽個電話。」安達接通。
「喂，拓植。」 ––早晨啊，牙清，人哥想問你吔唔吔m記，買完來你屋企一齊搭巴士去運動場?

「講咗幾多次，我大你幾個月囉…」安達歪頭後翻白眼。黑澤有啲羨慕甘望住可以同拓植frd到絕無羞澀嘅安達，果種舒服感係唔帶任何束縛嘅。雖然黑澤個咖啡早已倒瀉，但心底泛起少少嘅酸味，與脷底漸漸淡掉嘅咖啡苦味相輔相成。

––甘你吔定唔吔啊，清哥。 「我呢，其實呢，我就搭咗黑澤個順風車已經來咗運動場。」 ––嘩，你見色忘友!

「咩咩咩啊黑澤唔係…色囉。」

––我同你屋企甘近，係frd嘅你都兜埋我啦係咪先。

「甘我唔好意思問嘛。」

––算啦，識多啲人係好事。我最後問多你一次究竟要唔要我買埋啊。
「等我陣下。」
安達係想食啲熱野落肚，不過佢見黑澤落車之後個狀態甘down，support佢係最好嘅支持! 但齋係飲咗罐黑咖啡實在太dry。
「黑澤?」
「咩事?」黑澤哄埋去。
「hmm，你想唔想食m記早餐?」
「我出來前食咗早餐阿。阿清你肚餓?」黑澤一諗，哎呀，醒起今朝早打電話比安達佢先岩岩訓醒，個肚未落格。

「嗯，甘啊唔緊要啦，哈哈，拓植你幫我買個魚柳包餐啊。」

「阿清啊。」黑澤突然叫住聽緊拓植講野嘅安達。

「係?」安達即刻反應望住黑澤。 「都幫我叫個魚柳包啊。今日都多初賽同社務要搞，我食飽啲好啲。」其實黑澤個胃已經ok飽，但佢想要get到阿清嘅同款。

「好啊好啊。甘拓植你散嗌多個魚柳包比黑澤啦。多謝人哥!」

黑澤望左下手錶個時間，7點半。佢秤起個鞋袋，行去搭住安達個膊頭。
「阿清我地去睇下個場？應該開左啦。行啦我地。」跟手攬住安達行出門口。
「喔喔好啊。就咁先啦，我收線啦！」安達望左下親暱咁放在左肩嘅手，發覺黑澤有啲唔同左，但佢又講唔太出，不過黑澤放鬆返心情實在太好啦。

仲有段時間先到集合，安達就咁被黑澤親暱咁搭住一路行去更衣室，去locker放野嘅時候先鬆手。
「咦，無帶散銀添。」安達醒起散銀包最後個五蚊好似琴日拿來買左枝麥奶。
「阿清，啦，比你。」黑澤交左個五蚊銀比安達。
「哇！多謝黑澤，我放學還返比你啊。」安達抬頭笑住望返黑澤，開始正視依份感情嘅黑澤被安達個上目線擊中。

可惡！阿清真係好可愛，想把身上所有嘅五蚊銀比曬佢。
「咁你留低依個五蚊銀，決賽果日咪都用得囉！」
「你又岩喔。多謝你啊。」安達就將啲袋塞曬入去。
黑澤塞完野跟住望到安達個側面，注視佢後尾枕個則毛。
「你又訓到pat毛翹左少少啦。」黑澤忍唔住摸左上去。
「我等陣，等陣就用水濕一濕就OK。」在黑澤個視角，面紅嘅安達關上左locker門後就扎扎跳咁去左洗手台，黑澤微微笑左一笑。

「阿清今日你要跑100米啊，我地依家來做個拉筋先。」
「下，可唔可以唔做... ...好啦好啦，唔好扁曬嘴，我做，我做咪係囉。」安達開始有啲後悔點解今年唔只係報扔鉛球就算，但望著黑澤從閃令令個眼神到垂頭喪氣只需三秒，安達表示佢真係拒絕唔到黑澤。

跟住黑澤係跑道附近做曬全套拉筋嘅安達真係拿佢老命，仲被pe堂嘅要拉多幾錢重，諗起岩岩做腿後側伸展，被黑澤按住個背脊話烏低啲，再烏低啲，係啦阿清做得岩。安達自己痛到喔喔叫，仲被師弟妹見到，真係好羞家。

Aki_Yuki: 依家安達一屁股攤坐在跑道旁，望住黑澤行入跑道熟悉下個場地。
「阿清真係唔來一齊跑啊？」
「抖陣先，黑澤你跑啦，我望住你。」
「咁你嗌三二一我就跑啦。」
「喔，你就定位咪。」
黑澤走到起跑綫做半蹲姿勢，雙手按線嘅後方，微微低頭後再向前方直視。安達望住佢換上一副來真嘅表情，目光銳利如鷹眼。以美術生嘅角度來講，黑澤嘅身型真係好適合做model，平日被長褲遮住嘅小腿，如今一露出就係肌肉勻稱嘅美腿。仲記得岩岩做弓步轉體來拉筋嘅黑澤，哇那個舉直嘅手臂白皙得來又修長，個日光照落來，三角肌同二頭肌個線條真係好靚。
「阿清？諗啲咩咁入神？」
「啊？？喔喔喔，唔好意思，來預備，三，二，一！」安達紅曬塊面即刻三二一叫走左黑澤，唔通要講岩岩望住你個body入曬神咩。

係喎話說未po呢個

「高中番外」
便服日嘅中午。

黑澤同安達一路狂奔離開學校，行小路避開曬啲女，兜入學校附近商場條路時，安達先發現拓植唔響隊伍，佢以為今日講好左一齊走佬架嘛。左摷摷右摷摷，個皮褸加埋條褲咁多袋，沒一個袋裝住手機，臨時臨急都call唔到佢。

「拓植個電話你有沒啊，黑澤？」
「沒啊。你沒帶手機出來啊？」
「咁算啦。」拓植唔會餓親自己嘅。

黑澤同安達沒行商場正門，想食安樂茶飯，避開啲學弟妹係必要。
安達就指左去商場條後巷，架貨lift直上商場頂層，上到去再睇下有啲咩食咁。

行至椰lin閣，安達仲望緊有咩餐廳正，黑澤就掃到個餐廳個是日餐牌大大隻咁寫住『今日推介：萬聖節情人餐特價178一set！原價348！』

黑澤諗緊要拐安達入去試下啲佢想試好耐嘅野。
「阿清我地不如鋸扒？」
「無所謂啊，有肉食好OK啊。」安達四周圍望就隨口講。
「咁我地就依間啦。」黑澤即刻扑槌就依家啦！

黑澤拉住安達行入去，安達先發現成間餐廳都係姣紫色沙發，啲燈又好鬼暗，啲牆邊就掛埋啲萬聖節嘅骷髏頭啊，蜘蛛痴住蜘蛛絲咁啊，跟住仲點埋曬啲蠟燭懶有情調，以前同拓植來附近食飯，路經此地佢話過獨毒就算帶左手來食學生餐都勁尷囉。

「阿清你坐沙發果邊啦。」
「喔，好嘅... ... 之前我同拓植太毒啦無試過依間餐廳。」
「咁岩嘅，我都係第一次來喔。」
安達聽完一臉黑澤你係唔係呃我，你個樣響間懶高級嘅餐廳望上去好遊刃有餘咁，無同女女來過？

有個阿姨侍應走埋來斟左兩杯清水，擺低左啲餐具。

「唔該你。」黑澤禮貌咁多謝個阿姨，安達則翻開個餐牌，又有牛扒又有龍蝦仲有意粉任選，但啲單價樣樣過百。
「誒...咁多選擇你有沒諗過食咩好啊。」
「我想......多謝阿清一直無償咁幫我地社畫畫，唔單止好有你嘅風格，仲畫到我地嘅要求，所以依餐飯就等我請你啊。」
「...唔好嘅，我畫畫係咁上下姐。我地可以AA架嘛。」安達表示佢個銀包有帶夠錢。
「比我請你餐飯啦阿清！好唔好？唔好拓手踭啦，依餐我嘅！」
「呃... ...你話事啦。」

「靚女。」黑澤揮手。安達拿起就近嘅一杯水飲一啖。
「靚仔想食咩啊？」又係果個阿姨笑住行返埋來。
「就要依個情人節set啦！」
安達差啲就噴水，黑澤咁激進嘅！

「阿清唔想啊？我未同人食過，見個set平就所以想試下咁囉。」黑澤梗係有留意到啦，委屈咁回應返安達。
「誒，唔係，唔係，我沒乜所謂。」安達係有見到那個pinky浮誇餐牌寫住情人餐，但毒毒只係以為來鋸扒咋！！
黑澤聽完又即刻笑返，安達覺得黑澤真係好易氹，之前點解唔覺嘅。

「咁你地要白湯定紅湯？」阿姨繼續問。
「阿清揀先。」「白湯好啊。」
「咁我都跟佢一樣啦。」

「appetizer我想要依個Baked N.Z. Mussels with cheese。」
下，要講英文架？安達手指篤住餐牌跟讀。「呃...Fruit, Shrimps & Po...Potatoes Salad，啊唔該。」

「阿清話想鋸扒，咁我地一齊揀依個鐵板澳洲雪降牛扒？洋蔥汁定黑椒汁？」
「黑椒汁，七成熟。」「咁我要medium啦，洋蔥汁。」

「阿清嘅野飲要唔要等陣嗌？」
「我...我想飲紅豆冰。」安達細聲咁講。
「嗯？想要紅豆冰？」
「我今日著得咁型棍，飲咁甜嘅野好似好破壞曬成個風格咁。」
「咁見外嫁阿清！你想飲乜都得，咁就紅豆冰，我就......睇下先，鹹檸樂啊，就咁多，唔該你。」

「今日嘅甜品係心太軟，你地食完我地會再幫你地上。」
「唔該曬。」「唔該。」

阿姨好快送上個餐包同餐湯，得返佢地兩個嘅時候，安達為左食野方便就將拓植借比佢啲mk look戒指一隻隻除落來擺曬響檯面。

「我真係唔慣成手都係戒指，仲要拓植真係唔墜手唔買，我覺得我依個朝早都好似舉重甘。」安達一邊講一邊響個餐籃拿起塊包。黑澤望真啲安達嘅手，佢嘅小畫家手指修長，指甲剪得方正整齊，白雪雪嘅手背有層薄薄嘅手毛，望耐咗有啲可愛。

「不過學校唔係唔戴得咁浮誇嘅戒指咩。」黑澤執起其中一個玫瑰十字架銀戒指，轉左轉睇下個花紋。

「件褸本身係有啲長咁，所以就伸一伸直雙手，剩係露出手指部分，prefect咪見唔到甘囉。」
「但聽講拓植比人抓左來訓話咁喔。」
黑澤逐個手指睇下戴唔戴到個戒指，記得岩岩依個戒指好似就係在安達嘅無名指上。

安達就滅開塊餐包，浸啲白湯再食。
「唔~!白湯配餐包真係超正，唔會難食到邊! 咁拓植佢又係衰在個髮型到嘅，琴晚打電話同我講話佢要gel到好行，我話實出事嫁啦，佢又唔信喔。不過好在個訓導係佢表姑媽，今日就放過佢一馬咁囉。」

「原來佢有後台架。」黑澤個右手無名指咻地套入咗個戒指。
「拓植屋企係書香世家嘛，佢家族好似都係做學校嫁。 咦，黑澤你戴得入啊!」
「睇來我地無名指個尺寸係一樣嫁哦?」黑澤笑咗笑，又會甘岩嘅。

安達吞埋塊包，先繼續講。
「其他戒指好鬆，今日有幾隻戒指差啲sir落地下，幾鬼驚險啊，好彩我握實拳頭咋。」
「每隻都真係幾墜手下，咦，阿清你依邊嘴角有啲湯汁。」黑澤指左指自己塊臉個嘴角。

「喔喔，我lam下。」安達伸出條脷往黑澤指嘅方向舐左下白汁。
「黑澤你都食啦，唔好餓親啊。黑澤？？？呆左嘅？」安達響定咗形嘅黑澤面前fing下佢隻手。
「啊？... ...好～！」反應返來嘅黑澤同想象cut線後吞左啖口水。未來得切除低個戒指，咁岩個侍應送上頭盆。

「嘩，個青口好似好正呀！」
「有兩隻，我比個你啦。」恢復正常嘅黑澤刀叉並用將隻青口送去安達隻碟。
「咁我share啲沙律你啦w。」安達就筆返啲沙律加多隻蝦比黑澤。
「多謝阿清www。」

一兜細細嘅頭盆好快就食曬。牛扒就夠鐘上菜啦。
「黑澤你快啲拿起檯面果張大紙巾啦。」黑澤望過去，安達已經左右手拇指及食指夾起張大塊紙巾嚴陣以待，張紙巾仲遮過安達嘅口鼻，個手指仲翹起來形似蘭花指，安達興奮到好似細路哥個樣令黑澤忍唔住笑咗。

「哈哈，誒要做咩？？」
「等陣鐵板落汁就會咋咋響架啦，啲汁會彈到周圍都係架。黑澤你都快啲跟我一齊做啦。」
「好嘅好嘅。」黑澤有樣學樣。
「好啦，姨姨你可以落汁啦。」

在醬汁落鐵板嘅瞬間，澎拜嘅熱氣努力想攀升上天花板，伴隨鐵板滋滋作響嘅聲音，醬汁混合肉嘅芬香亦攻入食客嘅嗅覺與味蕾。黑澤第一次發覺原來食西餐都可以咁好玩。
「哇，洋蔥汁都好香啊。」安達羨慕咁望住黑澤碟牛扒。
「等陣share比你食啖？」黑澤寵溺咁同安達講。
「好耶！」安達眼神即刻充滿期待。

留待熱氣散到七七八八，安達除左件皮褸，就將塊紙巾sip左響個頸到保護件tee。

兩個人終於可以食正餐。當黑澤慢條斯理已經切好一塊牛扒落來放在安達個碟到，安達則響度同條牛嘅筋奮戰。

「點解切極都咁煙韌嘅！」安達認真切到出曬汗都搞唔掂邊緣果舊肉，啲汁仲唔小心湧出來濕到張餐紙。
「不如我來幫你啊。阿清你比你對刀叉我啊。」
在安達眼中，黑澤拿起刀叉就有如神助咁，把刀到佢手上，再難嘅肉，一𠝹就分開左。
「哇，你好犀利啊。」
「我幫你切開曬，咁你咪食得方便囉。」黑澤體貼咁將啲肉切割到啲肉望落去個大細都一樣。
「我覺得黑澤真係犀利到好似做手術咁啊。舊肉嘅大細真係好精準。」安達用食指一個指節對住舊肉，真係就咁大件囉。
「醫生依個職業我未諗過，阿清想我做？」黑澤似笑非笑咁望住安達。
「黑澤穿白大袍會好pro咁，不過你想做乜都應該難唔到你嘅，重點係你個夢想係咩？」安達好認真咁同黑澤講。

「咁... ...阿清你有咩夢想啊？」黑澤長長嘅眼睫毛低垂，望住塊牛扒，唔知點答嘅情況最好嘅應答方法就係反問對方。
「其實我都唔知啊，見步行步，安安穩穩咁囉。最近想做嘅係好好完成老師派比我做嘅畫作。」
「嗯，我都期待見到你嘅作品，你嘅牛扒切好啦，可以食啦。」
「嗚！黑椒汁配牛好好食！睇來黑澤係第一次食豉油西餐？」
「嗯！係第一次！平日屋企出街都會去下法國餐廳咁。」亦都係第一次同安達出街食飯！黑澤覺得今日真係幾得意嘅體驗。
「啦，黑澤你試下我嘅黑椒汁啦，好正架。來啦。」安達覺得黑澤真係一個好飯友，乜都會share佢一啖！所以黑椒汁牛一定要share比黑澤啊。

面對安達將塊牛隊到口面前嘅黑澤，唔擘大口好似唔係幾好咁，但下一秒舊肉一入口，黑澤即刻辣到成個嗨嗨。
「欸欸欸？黑澤唔食得辣架。」安達即刻好擔心咁望住佢。
「咳咳，食得，咳，我食得落架。咳，咳。」黑澤夾硬咀嚼舊肉，死都唔吐出來。
「喂啊，傻仔，唔好死頂喔。lur返出來啦。」望住連眼淚都飆出來嘅黑澤仲勉強食埋佢。
「唔啦，我得嘅，阿清喂比我唔係唔食咁傻仔，咳咳咳，唔～」黑澤講完就飲左啖檸樂想沖淡啲辣味，辣味依然未減，睇唔落眼嘅安達即刻將自己嘅紅豆冰隊比黑澤。
「紅豆冰有淡奶會減下辣架。」
「嗯嗯，唔該阿清。」黑澤對住個吸管即刻索左啖，總算啲辣味開始散去。

「sor啊黑澤。」望住黑澤飆眼水，安達都急到有啲想飆淚。
「沒野沒野，係我主動食嘅。」黑澤拍左拍安達個手仔，表示佢唔好咁擔心。
「我下次實記得嫁。」安達係咁眨眼想逼返啲淚水返去。
「好啦啲野凍啦，我地快啲一齊食啦。」

最後，果個心太軟因為飯鐘時間唔太夠，就打包返去學校。安達就響artroom畫畫嘅時候，在啊sir嘅縱容下當下午茶點心，邊食邊畫。

放學後，黃社借左嘅某班房。

「來我地練埋依個口號。」副社長拿住個大字報聲嘶力竭咁對住班Form 1仔叫。
而坐在教師檯嘅黑澤，有啲口痕響書包拿出個心太軟想咬啖。
有個眼尖嘅學弟即刻指住黑澤。「黑澤師兄！！！你食咩啊，我又要！」
「呃... ...」黑澤想講又係依個令人頭痕嘅小朋友啦，六角真係乜都想join埋架喔。

「澤少～～～～～你有沒離譜啲啊！」副社長沒好氣望住想偷食嘅黑澤。
「咁我唔食住啦，你地加油，繼續練口號！來，同我一齊叫，我嗌Yellow，你嗌House！」

由黑澤難得地帶領一齊叫口號，啲師弟妹特別興奮，士氣更加旺盛。

黑澤:「Yellow ！」社員:「House！」
黑澤:「Yellow ！」社員:「House！」
黑澤:「Yellow ！」社員:「House！」
一齊：「WOW…..Yellow House！」

黑澤諗，個心太軟都係今晚翻屋企溫書食啦。

TBC

P.s.為咗體驗鐵板餐我地成班接龍組去食花園真實配圖

（呢度開始係接返正文陸運會）
來來回回跑咗幾次之後，再食埋已經凍左一半嘅人哥早餐，佢哋就要暫時各散東西。負責係終點mark時間嘅安達去咗開工作人員會議，而黑澤亦都要去處理社務準備開場。接下來嘅都係一啲做下樣嘅流程，即係開幕禮個啲。校長出嚟講兩句廢話，然後就運動員宣誓，再升埋幾支旗咁，陸運會就正式開始。
第一個項目係400米決賽。作為社長，先拔頭籌提高士氣，呢啲都係自己應該要做嘅嘢。黑澤一直都係咁樣諗嘅。所以佢毫無猶豫就填表參加咗。身為常年嘅全能校草，佢理所當然咁令到黃社成為今場第一隊嗌到恭喜口號嘅啦啦隊，以冠軍姿態大熱勝出。比起其他人係最後關頭會因為急切而開始面容扭曲咁加快速度，黑澤由頭到尾嘅眼神都一樣咁堅定，好似無視唒其他萬物咁樣只係望住個目標前進。黑澤跑步嘅英姿連安達都覺得佢型。

默默地企係終點線mark分嘅安達望住佢跑完之後偷偷地背住看台歎咗一口氣，當社員衝上嚟同佢慶祝嘅時候又瞬間掛起笑臉。果然係十項全能嘅校草啊。安達到而家都覺得同黑澤做到frd係一個奇蹟嚟。

賽事都進行得如火如荼。話咁快就到咗進行100米初賽嘅時候。安達趁賽事開始前半個鐘，同下一更交代咗一聲之後就行反去隔離啲櫈仔坐低綁鞋帶。諗起自己要參加100米都係因為黑澤之前同自己講今年冇上年咁多人肯參加sports day，啲健將同自己又已經full唒三個參賽名額。講嗰陣個語氣仲要好擔心咁，又用狗狗眼望住自己。識開安達都知佢好鬼容易心軟。一個校草做埋啲咁嘅表情望住自己，根本就唔會忍心唔幫佢。於是安達就嗱嗱臨同佢講自己OK，唔介意會跑包尾就得。黑澤個一下即刻笑到見牙唔見眼，安達個心先至安樂返。

「⋯啊清！啊清你係邊呀？」

諗起黑澤就突然間真係聽到佢叫自己把聲，安達爭啲以為自己幻聽。原來係黑澤真係喺度搵緊佢。

「我係度呀黑澤！咩事呀？」
「終於搵到你啦！我想睇吓你有冇著到釘鞋咋」

黑澤仲係啱啱跑完400米個個樣，著住件濕晒嘅跑步背心短褲同埋釘鞋，好緊張咁捉住安達問佢。

「梗係冇啦，咁pro嘅嘢我點會有啊，反正我都只係陪跑咋嘛，唔使啦」
「點得㗎？你一陣跑得太快冼襯點算？着釘鞋先至可以防滑啊！你又可以跑得再快啲。我記得你著43號㗎嘛，我而家去問下人借鞋畀你！你乖乖地坐喺度等我先 」

安達都唔知由邊度開始吐嘈好。點解好似預設咗自己一定會跑得好快咁？？都嚟唔切反應阻止佢，黑澤已經跑番上看台。

「有冇人有43號釘鞋！！！」

突然之間成個看台就充斥着黑澤透過大聲公大叫嘅聲音。好啦，而家全校都知黑澤要釘鞋啦。唔理係唔係黃社，條條女都使盡渾身解數周圍問人，想幫到黑澤，從此成為佢嘅左右手，升級做哨兵，做埋大將軍，好幸福啊！而黑澤亦都冇就咁企喺度等運到，佢周圍問身邊嘅friend有冇帶多對鞋，又lur下其他社可唔可以借一對出嚟。不過就算係校草都好，要搵到一對咁啱43號嘅釘鞋而人哋又肯借嘅機會真係唔多。眼見剩返十分鐘就要比賽啦。黑澤真係愈嚟愈心急。眼利嘅佢咁啱係旁邊樓梯見到一個男仔，好似啱啱參加完比賽返嚟咁，仲着住對釘鞋添！即刻就行上去問吓佢。
「Hello!」
「嘩！！係黑澤師兄！！」
個男仔一惡高頭，黑澤就認得啦。原來係自己社嘅師弟。六角啊嘛。

黑澤呢世都唔會忘記佢個名，因為佢就係練cheering嘅時候篤爆自己想偷食心太軟嗰個師弟啊！其實佢嗰日都只係想回味一下同安達食飯嘅感覺，點知畀佢閘住咗。但係黑澤都知呢個師弟特別有社愛，有乜嘢社event都第一個參加。作為社長真係對佢又愛又恨。

「Hi六角，你個對係咪釘鞋嚟？」
「係呀師兄！！我呢對就勁啦！係Nike嘅全黑款，再加個金色大tick，真係型到爆呀！我話你知啊我琴日lur呀媽佢⋯」

又開始啦。黑澤同佢講過幾次野，已經知係緊急時候要閘住佢，如果唔係佢可以鳩吹到聽日都得。

「喔原來係咁啊哈哈，咁你係咪著開43號？」
「係呀！！師兄點知㗎？！！好開心呀師兄有留意我！！」
「可唔可以借畀我？」

=

「啊清！！我搵到啦！！！」
當安達坐到比賽開始之前五分鐘，心諗黑澤應該唔會搵到，正準備入場嘅時候，就見到黑澤拎住對鞋勁大汗咁一路跑一路大嗌。
「嘩⋯咁都畀你搵到⋯」
「梗係！我係社長嚟㗎嘛，死都會保障我嘅社員㗎」
之後黑澤就叫安達坐底，然後抬起安達嘅小腿，幫佢拆咗條鞋帶再除埋對鞋。
「黑澤⋯！？我可以自己嚟⋯」
「啊清你一陣要跑步就唔好郁咁多啦」
見住黑澤好溫柔咁除完一隻着一隻，著完左腳就著右腳，然之後磅到條鞋帶緊一緊，再將多出嚟嗰兩條塞返入去。
「點啊？啱唔啱着？會唔會好緊或者好鬆？」
「唔會啊⋯仲舒服過我本身對鞋五倍有多⋯」
「五倍咁誇張哈哈哈哈」

見着落冇乜問題咁，安達都準備起身行去準備。但係黑澤又突然間坐喺安達隔離。
「一陣間輕鬆啲跑就得㗎啦，記住唔好受傷呀，唔使咁緊張，我會喺上面同cheering team幫你加油㗎！」
呢一下安達覺得黑澤好似望穿咗自己咁。忍唔住都同佢講下自己嘅concern。
「你又知我緊張嘅⋯原來咁明顯⋯」
安達用手搓一搓自己軟林林嘅臉豬登。
「其實都真係有啲驚跑包尾，好似辜負左你哋幫我加油咁」
講咗出嚟之後安達又有少少後悔。作為一個男人，好似佢咁軟弱，唔知黑澤會唔會對佢好失望呢。然而黑澤完全冇唔開心嘅表情，反而捉實安達隻手。
「你講咩呀。我相信呀清你一定會做得好好㗎！係我心目中嘅呀清做咩都落足全力畀足心機，只係呢一點就已經冇辜負到我哋幫你嗌嘅口號啦。有時試下一啲新嘢，可能會得到意想不到嘅結果呢？」

=

黑澤望住安達入場之後就急急腳跑返上看台。係上面望落去，安達個人好似仲好僵硬咁，只係企喺度轉下個腳腕。黑澤決定爭取時間對住cheering team做少少briefing先。
「Ok everybody！今次100米我都有R到一個社員參加㗎！佢叫安達清！我想大家一陣間落足一百二十分去大嗌，一定要大聲過其他社，OK？」
「好！！」
「一陣我哋嗌go ahead，不過我想最後個句變做清清清清is the best！黃社做唔做到！」
「OK！！」

=

聽住裁判嘅預備聲，安達學下隔離啲人咁擺好咗個起跑Pose。三、二、一！喺安達用盡全力衝出去嘅嗰一刻，黃社嘅啦啦隊亦都聲嘶力竭咁大叫口號。
「go go go ahead！be be be the best！go ahead！be the best！清清 清清 is the best！」
安達一路跑，一路就聽到觀眾席傳嚟一大堆大叫嘅聲音。唔同社嘅口號都夾雜住一齊，其實都唔係好聽到大家叫緊乜。不過有一句佢真係聽得特別清楚。由其是跑到去黃社對住嘅位置個陣。
「⋯best！清清 清清is the best！Go go go ahead！⋯」

？？？點解好似聽到自己個名？？清清係嗌緊自己？？不過安達都冇多餘嘅心機去為呢件事感到羞恥。諗起起跑之前黑澤對自己講嘅說話，佢出盡以前追巴士返學嘅奶力，幻想住前面有架巴士就嚟準備開車，就咪埋隻眼唔理三七廿一係咁向前跑，左手同右手不停地擺動，求神拜佛希望隻腳可以跟上自己想跑快啲嘅心情。差唔多啦，仲差兩步，係時候最後衝刺。一直唔敢望住前面或者隔離嘅安達抬起頭，前腳尖落地，腳踭未掂到地下，另一隻腳嘅腳尖直接點係終點線上面，完成賽事。歡呼聲此起彼落。安達都未有力睇自己成績，反正都唔會係第一。頭先惡高頭好似已經見到好多人跑到終點，應該唔係包尾都尾二。當安達慢慢行返去場邊，仲抖緊大氣嗰陣，就見到黑澤對住自己跑緊過嚟。

安達下意識就以為佢想快啲還返對釘鞋比個同學去參加下一場比賽，仲準備烏低身想除返對鞋出嚟。點知黑澤跑到嚟自己面前，唔單止冇停低，仲一野攬到自己實一實。
「嘩⋯呢個就係嗰個清清？」
「未見過黑澤攬人喎⋯」
其他同學嘅意見真係令到安達相當尷尬。而且，而家除咗黑澤件衫濕晒之外，安達都係一樣。一諗到佢哋咁樣好似唔係咁好，就想叫黑澤不如放開大家先，有事慢慢講。
「黑⋯黑澤⋯？」
「呀清你真係好叻呀！」
「？？咩事？」
黑澤放開咗安達之後，依然非常之雀躍咁望住佢。
「你跑第四呀！第四！！」
竟然有第四？安達自己都有少少意外。不過每一組只有頭三名入到決賽。所以安達已經可以確保係輸咗。
「對唔住呀，入唔到決賽⋯」 「講乜嘢啊!!你已經好叻㗎啦！參加咗已經會有社分！所以而家係開心嘅時候啊!!!」

明明啦啦隊叫完清清清清is the best都已經坐返低休息緊。只係得黑澤一個衝落嚟同自己講恭喜，覺得自己已經好叻。其實安達好想講，都係多得黑澤鼓勵自己，話會一直幫自己加油，自己先至可以堅持到終點。四年來安達喺學校從來都冇要出人頭地嘅諗法，亦都冇諗住要做啲乜嘢引人注目。第一次真真正正咁為咗自己個社去做一啲野，雖然輸咗，但係原來真係會好有歸屬感。
「多謝你啊，黑澤」
千言萬語匯聚一身，最後就集合成呢一句說話。因為安達冇呢個恥力講唒自己嘅想法出口。

我可以跑到終點都係因為你。我覺得自己而家好似多咗勇氣去挑戰新事物啦。

100米嘅初賽完結之後，安達又因為見到黑澤急急叫咁周圍lur人參加拋圓球而自告奮勇即時填表參賽。就算黑澤叫佢唔好死頂、跑完休息下，佢都係好堅決咁報咗名就行入場。掉圓球呢啲嘢好快掉完。雖然安達都係冇贏到任何野，但係志在參與啊嘛。拋完之後安達就打算上反看台坐低唞一陣，反正佢下一更做mark分嘅staff已經係lunch之後。先啱啱行到上去，就聽到宣佈話4X400米決賽準備開始了。醒起黑澤有提過話自己會參加呢一項，於是安達又默默地行去啦啦隊隔離嘅看台第一排。

黑澤同其他隊友已經入咗場了。啦啦隊亦都開始打氣。睇黑澤排隊嘅位置，佢應該係最後一棒。雖然望落黑澤好似同其他人有講有笑咁，但係安達硬係覺得佢個樣好凝重咁。唔知係咪緊張呢？
突然之間黑澤好似感受到安達嘅視線咁，一另轉頭就對住安達笑。搞到啦啦隊嘅師姐師妹以為師兄係望緊佢哋咁，引發咗咗一場小小嘅尖叫。安達一開始都有少少混淆。於是佢舉起咗少少手，偷偷地揮下。然之後黑澤又真係大大力回揮反。果然黑澤係真係望住佢。嘿嘿，唔知點解好似有一種偷情嘅感覺。你哋嘅校草唔係望緊你哋啊，係望緊我啊。諗到呢度，安達都忍唔住笑咗出嚟。好似真係就嚟要開始了。安達又再舉起少少隻右手然後握拳。加油啊!
而黑澤亦都向自己舉起姆指。放心啦!

伴隨住一聲槍響，比賽開始啦。跑道上嘅運動員個個都爭先恐後咁向終點衝去。啦啦隊嘅聲音亦都特別響亮。一開始黃社係跑得最快嘅。第一棒亦都好順利咁透過些微差距維持住暫時第一。點知交棒就係惡夢嘅開始。第二棒嘅同學可能因為太緊張，接個陣就唔小心跌咗棒。搞到其他社一口氣咁衝前，令到黃社瞬間由第一變咗做包尾。個個都開始焦慮起嚟。連啦啦隊都叫得再大聲咗。不過好景不常，連第三棒嘅同學都跌埋棒。係呢個時候，黃社已經落後咗其他社三分一個圈。
就嚟到最低一棒啦。安達望咗下黑澤，感覺佢好似有啲失去咗一開始嘅餘欲，個人好緊張好僵硬咁企喺度，一直緊緊咁望住隊友跑到最後100米，然之後就擺好咗一個專業嘅起跑Pose。
係時候啦！黑澤一邊助跑，然後非常迅速又慎重咁接咗上一手支棒。用迅雷不及掩耳嘅速度就衝左出去。

「黑澤火箭好鬼快！
郁D跑贏全世界！
所有獎牌佢攞晒！
齊齊慶祝Give him Five！」
唔係講笑，佢真係好似隻超音鼠咁。一上場唔使一陣就追反落後個三分一個圈，然之後就一直急起直追，跑到同目前第一名嘅紅社平排。已經係最後50米。臨到終點前一刻，黑澤用一個大跨步直接跳去終點線，然之後就成個人仆低咗！安達亦都係呢一下就由看台衝咗落去。而紅社亦都以差唔多嘅時候衝咗線，可以話係用肉眼根本就分辨唔到邊個第一。
過咗終點之後，好彩黑澤好快就爬番起身，令到跑到場邊嘅安達都鬆一口氣。而裁判又一直都未宣佈冠軍係邊個搞到大家都囉囉攣。
「冠軍係⋯黃社！」
「嘩啊啊啊啊啊啊啊啊啊啊啊啊啊啊啊」

聽到呢個喜出望外嘅結果，大家都亢奮到不得了。由中間開始跌棒，根本就冇人expect過會拎到獎牌。結果都係靠住黑澤，先至keep到黃社連續四年400米接力第一嘅寶座。係呢一下，就好似黑澤拎咗世界冠軍咁，隊友即刻就衝上去攬住佢，而場邊嘅黃社同學亦都沖埋上去圍住接力隊大叫。而啦啦隊當然就係上面狂叫恭喜口號啦。
安達見到已經咁多人行咗埋去，自己就費事過去了。好多個人一直係度不停咁講好彩有黑澤咋、果然係精英、黑澤真係好勁啊。而黑澤亦都只係企喺度笑下咁。明明係好正常嘅一個畫面，但係安達硬係覺得有啲違和感。呢個感覺係開跑之前已經feel到。

明明之前黑澤拉住自己跑落art room仲一啲都冇喘氣，但係而家已經跑完咗成5到10分鐘，黑澤都仲喺度抖緊大氣。安達又再行近左少少望真啲，發現黑澤個嘴唇真係好乾，好似冇乜血色咁，而呢個格硬整出嚟嘅笑容，真係好假。
講真黑澤跑完之後唔知點解，佢覺得特別特別攰。成個人輕飄飄，好似抖極都抖唔夠氣咁。頭先接力望住連續兩個隊友跌棒真係嚇到佢標冷汗。佢知道自己必須要跑贏呢一場比賽。於是去到佢嗰陣佢就出盡左全力。頭先可能係佢成世人跑得最快嘅一次。嗰個衝力大到佢到終點嗰陣成個人仲仆埋落地下。其實個一下真係有啲起唔到身嘅感覺，不過下1秒又宣佈咗冠軍，成班人過嚟同佢慶祝嗰陣，佢已經冇時間再理自己今日嘅身體點解會咁奇怪。唯有盡力令到自己平伏返，最多一陣lunch time瞓一陣姐。應該冇事掛。全世界望住自己嘅時候絕對唔可以咁樣衰。

正當黑澤係心入面叫自己頂住嘅時候，突然間佢就覺得天旋地轉，開始有少少睇唔到野，仲有少少想嘔。Shit，真係頂唔住了，要係真係暈之前離開大家面前先得。點知佢行咗第一步，就覺得自己手軟腳軟，雙腳已經支撐唔到自己嘅身體。就係佢準備跌落地下個一刻，佢feel到有人托住咗自己膊頭，然之後拎起自己隻左手繞喺佢個膊頭上面，成功托返起自己。

「我⋯我同黑澤食lunch之前仲有啲嘢搞，我哋走先」

黑澤用住浮浮沉沉嘅腳步，靠住一直托住佢嘅安達，堅持扮到自己冇嘢離開咗大家嘅視線。今日嘅老師同埋紅十字會都去晒場邊支援聖約翰救傷隊，所以醫療室入面完全冇人。一打開道門，黑澤即刻就腳仔軟到已經行唔到路咁濟。安達唯有用毅力托到佢去床邊為止，然之後再托埋黑澤對大長腿上床等佢可以平躺。
「你咁樣會死㗎你知唔知」
安達望住訓係床到面青口唇白嘅黑澤，真係覺得又嬲又心痛、望住佢係其他人面前扮唒野就仲心痛。
「對唔住啊⋯」見黑澤咁可憐咁嘅樣，安達都唔忍心再講啲咩。佢周圍搵咗支水，就開咗個樽蓋畀黑澤飲兩啖補充下水分先。趁住呢個時間，佢又搵到支未用過嘅探熱槍嚟幫黑澤探熱。好彩冇發燒喳。安達默默心入面歎咗一啖氣。而黑澤飲咗兩淡水之後就放低咗。另轉隻右手放咗眉額位，想咪埋眼唞下。佢的確已經冇任何力氣再扮冇事了。

但係細心嘅安達就發現咗佢手掌紅紅地咁。
「你畀隻手我睇吓」
安達都唔算係問，幾乎用一個命令嘅語氣講完就猛反黑澤隻手落嚟。一打開個手掌，果然同安達預測嘅一樣，一定係頭先衝去終點仆街個陣擦損咗啦。右手手掌連接手踭嗰啲位都紅晒，又甩晒皮，仲有啲位滲咗少少血出嚟咁。
「你唔痛㗎咩…」
安達即刻又起身周圍搵下消毒藥水個啲嘢。好彩個急救箱都算齊全，乜嘢都有。
「你唔好郁喎，我幫你消毒下先⋯」
黑澤由訓咗係床個下就一直迷迷糊糊咁望住安達為咗自己行嚟行去，而自己就乜都做唔到。仲以為自己收埋得好好，點知都係畀安達睇穿咗。
黑澤優一你真係好樣衰啊。
但係呀清見到自己咁狼狽都依然咁溫柔。
點解佢會咁好㗎。
「嗚⋯」 本身安達仲好專心咁輕輕力用蘸咗消毒藥水嘅棉花洗緊個傷口。突然之間傳嚟嘅哭泣聲真係嚇到佢即刻停低咗動作。

「!?好痛啊..??呃、你唔好喊啦⋯乖啦、最⋯最多我再細力啲啦⋯一定要洗㗎如果唔係細菌感染點算啊⋯」
於是安達又好緊張咁放低晒啲棉花，用嘴對住個傷口位吹氣想佢冇咁痛，點知黑澤完全冇收聲嘅打算。所以安達又急急腳拎咗自己嗰塊繡住櫻桃嘅毛巾仔出嚟同佢抹眼淚。
「呃⋯一陣就唔痛㗎啦⋯」你唔好喊得咁陰公啦大佬⋯安達覺得而家搞到好似係自己整喊咗黑澤咁⋯佢只係為咗黑澤好咋⋯
「我唔痛呀⋯⋯」
仲未完全恢復嘅黑澤連講嘢都虛弱過人。佢用左手捉住安達幫佢印緊眼淚嗰條毛巾。
「我覺得自己真係好廢啊⋯明明係社長⋯點知sports day半日都未過就瞓低咗⋯咩都做唔到⋯一陣間跳遠又仲未搵到人⋯啦啦隊又要人lead⋯其他社長都唔會咁⋯嗚⋯得我一個⋯」

一口氣講咗咁多嘢，黑澤講完都有啲唔好意思。佢從來都冇試過同人呻，由細到大都係自己消化完就算。好啦連啊清都坐返低冇講嘢，自己真係唔應該同人哋講呢啲。唔通真係以為啊清同自己好熟咩？而家搞到人哋唔知點應啦。
「冇⋯冇啲咁嘅事囉⋯」
安達遲疑咗一陣之後，好認真咁講。
「你為咗個sports day，每日都要早過人返學開meeting，之前仲特登放學教我英文、樣樣野都親力親為⋯同埋頭先我只係去陪跑，你都周圍幫我搵釘鞋，又好大聲幫我加油⋯都、都係多得你，我先至跑到去終點㗎咋⋯」
「所以黑澤你已經好努力㗎啦」

第一次聽到人哋話自己已經好努力。黑澤聽到自己個心臟跳得好快，頭先忍住唔想再喊嘅眼淚又重新係個眼眶到long下long下。從來都係畀人expect做咩都100分，自己一直都好驚會畀人話得個樣。而事實上呢啲謠言佢都唔係冇聽過。為咗成為同學老師老豆老母眼中做乜都咁出色嘅全能校草，佢做咩都落足二百分嘅力，直到大家覺得滿意為止。明明自己天生個樣已經幫咗佢好多，所以佢從來都覺得自己唔應該抱怨。但係得安達一個，就算見到佢個人成Pat爛泥咁，對自己都一樣咁好，仲要又安慰佢又照顧佢。黑澤諗起，比起其他人個種非常之廉價嘅溫柔同奉承，安達頭先對佢講嘅說話可能好笨拙，但係真係格外真誠。

「好啦你唔好再喊啦、訓一陣先」
「但⋯但係我一陣仲要lead cheering⋯」
「我幫你同副社講聲啦」
「咁⋯我幫cheering team佢哋訂個啲飯盒又唔知到咗未⋯」
「我頭先落嚟之前見到已經到晒啦」
「咁⋯但係⋯我一陣仲想落場跑啊⋯」
「搵第二個囉！最多、我幫你跑！」
「⋯嗚」
「唉⋯總之而家lunch time有成個鐘，你就瞓陣先啦，瞓完睇下你仲有冇覺得暈，到時再決定啦好冇」
安達放咗隻手係黑澤個心口上面，拍下，拍下。
「瞓啦，我陪住你」 成個醫療室都充斥着消毒藥水嘅味道，再夾雜住小小汗味，仲有啲間房太耐冇開過嘅up味。傷口傳嚟嘅輕微剌痛都好似傳埋落個心入面咁。係呢一刻，黑澤終於明白咗，點解佢以前咁想見到安達開心，點解會成日下意識就去咗幫佢，點解可以咁放心係佢面前做自己。 原來，我鐘意咗你啊，呀清。

原來中意一個人嘅滋味係咁嘅...黑澤諗。作為一個全能校草，黑澤嘅身邊永遠都會有各式各樣嘅美女圍住佢。講起都好笑，其實除左靚女之外，都有男仔試過寫情書同黑澤表白。不過黑澤係一個直男，咁理所當然地佢就拒絕左對方啦。黑澤從來都冇諗過，自己居然有一日會中意左個男仔。

安達繼續慢慢喺黑澤心口拍下，拍下：「黑澤辛苦你啦，你快啲瞓下休息下先啦。休息夠先至可以喺下半場繼續努力架嘛。」

黑澤雖然都好想可以聽安達話瞓下覺，但係佢呢一刻完全瞓唔著。佢覺得自己嘅心跳因為安達望住佢而有所加速。

安達見到黑澤望住個天花板發呆：「黑澤？你瞓唔著啊？」

「啊...係啊....」黑澤知道自己未係時候向安達坦白：「可能係我瞓唔慣張床掛....」

「咁啊.......不如我唱歌哄你瞓啊...」

「下？」

「哦...細個嗰陣呢...有時我阿媽唔得閒我會幫手哄我細佬瞓架。拿，你乖乖地合埋眼先...」

「嗯... 咁麻煩安達你啦...」

「小寶寶...食蛋糕.....」

「噗。」黑澤忍唔住笑左出聲。

「喂啊... 你笑嘅我唔唱架啦...」安達有少少扁嘴。

「唔笑唔笑。」

呢隻歌如果換左比第二個人唱，黑澤可能會笑到收唔到聲。不過對方係阿清喎... 佢唱乜都好啦，黑澤都會覺得好冧好安心。聽住安達輕柔嘅歌聲，黑澤覺得眼皮越黎越重，慢慢就瞓著左。

「嗯..... 」唔知過左幾耐，黑澤終於又再睜開雙眼。佢坐左起身望左一望醫療室四周，但係佢好失望咁發現安達已經唔喺度啦。黑澤突然覺得個心好似穿咗個窿咁... 不過又係嘅... 安達都有自己嘅野要忙，又冇理由會等到自己醒嘅...我又唔係佢邊個...

呢個時候醫療室嘅門突然比人推開左。黑澤抬頭一望居然係安達！

「啊，黑澤你醒啦？」安達見到黑澤醒左即刻小碎步咁跑番去床邊：「你見點啊？個頭仲有冇暈啊？」

「我冇乜事啦...」黑澤見到安達即刻成個人清醒哂：「阿清你...」

「下？我？」安達放低左佢一直拎住個膠袋：「我啱啱去左個廁所咋嘛，估唔到我一行開你就醒左啦。」

「你...頭先一直陪住我？」

「係啊...咁我驚你醒左都仲會頭暈啊嘛，所以咪唔敢行開囉。」

「咦？係呢... 我瞓左幾耐啊？」

「哦，你瞓瞓下都過左兩個鐘啦，連lunch time 都完咗啦。不過你放心啦，雖然我冇行開，不過我搵左人哥幫手交代架啦！所以比賽方面你唔使擔心架。」

「但係....咁咪大家都知道我....」黑澤又諗番起自己作為一個社長但係咁廢，又開始眼濕濕。

「妖！黑澤優一你夠啦下你！」安達突然爆發：「都話你唔係廢囉！你比起好多人黎講已經好叻架啦！你睇下我？我呢啲先叫廢囉好唔好？我運動唔叻，跑個100米都淨係得個第四，讀書又唔叻，連溫書都要靠你教我！我啊！平時靜係識自己摺埋一舊，朋友都唔多個！要講廢我先至係廢中之廢啊！所以黑澤我唔准你再睇低你自己啊！唔好再鑽牛角尖啦你！拿！我宜家同你講啊！你再係咁架呢！我以後唔理你架！」

安達講到喘晒氣咁，順手就拎起左支水飲左一啖。只係佢冇留意到自己飲左嗰支係黑澤啱啱飲過嗰支水。

「........」黑澤識左安達咁耐都未試過見到佢咁嬲所以比佢嚇親。

「..... Sorry啊黑澤....我唔係有心咁惡話你架....」唔好話黑澤啊...安達自己都比自己嚇親啊。佢好似....咁大個仔都冇試過咁兇咁鬧人架... 「你...唔會嬲我...架可？」

「哈哈哈哈哈哈哈哈哈哈哈哈哈哈哈哈！」黑澤忍唔住大笑左出聲：「阿清你真係好得意啊你。」

「你又笑我！」安達又再一次招牌式扁嘴：「我好認真架！」

「估唔到安達你都會咁鬧人架喎！」

「其實我都唔知點解我頭先會咁嬲嘅... 我咁大個仔都冇試過咁鬧人架..... 拿！咁你笑番即係ok架啦喎！拿！你唔准再睇低自己啊你！唔係我....我....」

「唔係點啊？」

「我....我就見一次鬧一次！」

「好啦好啦，我應承你我唔會再亂諗架啦！」黑澤見到安達咁緊張自己真係好開心。佢第一次感覺到原來自己中意嘅人關心自己原來係咁幸福嘅。

「係喎！你瞓左咁耐一定好肚餓㗎啦，我買左嘢比你食啊！」安達打開個膠袋：「拿，你訂比cheering team嗰啲飯盒咁油膩呢就冇你份架啦！我見你唔舒服所以特登幫你叫左碗粥啊，你快啲趁熱食啦。」

「唔該你啊阿清。」黑澤呢刻真係覺得好感動，佢又開始眼濕濕。

「啊！我差啲唔記得左添！黑澤你右手整親喎！咁你咪唔方便食嘢囉。」

「唔緊要，我用左手食咪得囉。」黑澤嘗試用左手拎起隻匙羹食粥，不過佢真係唔係好慣用左手食野，所以手震震咁。佢食到天一半地一半咁，食到安達都睇唔過眼。最後安達一野搶走左黑澤個羹。

「哎呀見你手震震咁，等我喂你啦。」講完之後佢就潷起左一啖粥遞到去黑澤嘴邊。

「乜...碗粥咁甜嘅...」

「下？呢碗白粥嚟㗎喎....」

「係咩？」

「係啊.....」

就係咁，安達慢慢咁一啖一啖餵黑澤食完左碗粥。佢冇留意到嘅係...黑澤趁佢唔為意嗰陣，偷偷地收埋左嗰支啱啱佢哋兩個都飲過嘅水。

「咦，黑澤同學你見點呀，好啲未？」醫療室嘅門口俾人推開，負責醫療嘅藤崎老師笑笑口咁拎住醫療箱行入嚟，黑澤同安達即刻坐返起身尷尷尬尬咁彈開。

「啊，老師。」「老師，我好返好多啦。」

「咁就好啦，唔駛咁緊張喎，我入黎擺低啲嘢啫，你哋可以慢慢坐多陣架。係喎，阿清你食咗飯未？」

安達摸一摸自己個肚仔，頭先一放break就趕住要衝出去周圍搵粥舖，撞正食飯時間排咗陣隊又要趕返運動場，完全唔記得要買自己嘅午餐。返到嚟又顧住要照顧黑澤。直到miss提起，安達呢個時候先感覺到飢餓。佢唔好意思咁講：「未呀，哎呀呢個時候唔知小賣部仲有冇嘢食賣呢，陣間上去食碗餐肉米得架啦我。」

「都知你架啦，平時你上我堂個陣都成日顧住畫畫，畫到直落lunchtime唔記得食嘢，拿miss私人醒你嘅，後生仔發育唔準時食嘢點得架呀。」藤崎老師係個箱度拎咗兩個飯糰同盒麥精出嚟塞俾安達。

「多謝希姐！嘩係飯糰呀，好嘢！」安達對眼即刻發晒光咁，雙手接過飯糰就即刻熟手咁拆開咬咗一啖，開心到對眼瞇埋咁，藤崎對佢哋笑一笑就唔阻住一對兩小無猜行返出去。

「miss去準備下陣間頒獎儀式啲嘢先，阿清你幫我睇住黑澤啦。黑澤你要休息多陣就搵人同我講聲，我會同你班主任仲有house supervisor單聲架啦。陣間輪到你上頒獎台個陣實叫你嘅，唔駛擔心。」

黑澤頭耷耷咁點頭，安達就一路咬住飯糰揮手同老師講bye bye。

「Miss佢真係好好人呀，係喎，都一點四啦，差唔多要集合，」黑澤望住坐係床邊努力食緊飯糰谷到個咀仔好似哈姆太郎咁嘅安達，講咗出口先有啲唔捨得催佢起身。安達為咗照顧自己連晏晝都唔記得食，諗到呢度黑澤個心就拿住拿住又一陣甜蜜，可能係佢望住安達太耐，安達擰轉面同佢對視咗一陣就拆開另一個飯糰塞到黑澤嘴邊。

「比你咬一啖啦，不過我好鍾意吞拿魚沙律味架，唔好咬咁多喎。」

見黑澤hang咗機咁，安達再遞前啲，遲疑嘅黑澤都係擘大口咬咗一啖。滿意嘅安達拎住飯糰繼續塞落口口齒不清咁講：「頭先見你眼甘甘咁，食白粥肯定口淡淡啦，唔洗怕醜喎。」老實講，個飯糰普通咁酸酸地又有啲乾，但係同頭先碗粥嘅心意鬥甜不相上下，黑澤一邊拆開飲筒插好包麥精遞比安達，笑住搖搖頭同佢講多謝。

其實唔係呢個問題。黑澤諗，10月28號嘅下晝一點廿二分，啱啱算唔算係間接kiss咗？安達竟然唔怕食自己啲口水？佢努力回想返同柘植三個人一齊食飯嘅畫面，但係都無咩收穫，安達會唔會比柘植咬一半塊扒跟住自己再食？

係黑澤個腦仲係接受緊自己鐘意咗安達同安達對自己毫無防備而天人交戰緊，安達已經極速食完遲來嘅午餐，走出去幫自己同黑澤點完名再返嚟。

「我啱啱係門口撞到你副社，佢拎咗件制服落嚟叫你換返呀。佢好似好擔心你咁。」安達手上多咗一件白色嘅社長polo制服同校服褲，黑澤一邊話：「叫六角拎過嚟咪得囉，做咩掉低班細行開呀......」就接過拉埋度簾換衫。

仲有幾分鐘就開始頒獎，黑澤同安達都無返上看台，就係企係醫療室出面等嗌名集合。好多老師同同學行過都問候黑澤，而佢都微笑咁回應佢哋話無事多謝關心，仲講笑話自己想蛇王先係醫療室訓下覺咁。安達扒係欄杆拉下筋咁睇住黑澤，望咗一陣黑澤就行咗去頒獎台前面，同每一個拎到牌嘅社員擁抱祝賀。差唔多到頒獎典禮嘅尾聲，黑澤終於比興奮到聲震震嘅廣播同學叫咗出去。

「A Grade四百米冠軍，4A班黑澤優一！」

上面嘅看台傳嚟震耳欲聾嘅歡呼聲，安達不禁向上望一望。咁啱企係大會攝影師後面嘅安達視線望返落嚟果陣，就啱啱好同拎住個獎牌露出完美笑容嘅黑澤對上咗視線。

「麻煩黑澤同學留一留步，跟住我哋要頒埋上半場最後一個獎啦。社際4x400米，季軍係藍社！亞軍係紅社！最後，冠軍係...黃社！恭喜各位！」孤零零企咗係頒獎台一陣嘅黑澤終於比隊友衝上台攬住舉起咗，黑澤舉起獎牌向人群中嘅安達揮揮手，安達都舉起手微笑應返佢。

黃社嘅一眾社委一早就企定係場邊迎接佢哋嘅戰神，黑澤一行落頒獎台就被六角同副社衝埋嚟攬埋一舊跳起慶祝，而無佢事嘅安達就走返入人群裡面去救傷隊帳篷搵柘植。

仲有幾個項目完埋就放學，一心諗住走人就直衝去東方188*睇figure同買老翻碟嘅安達同柘植就縮咗上無咩人嘅看台最後一排傾下閒計打發時間。

「係喎，黑澤無咩嘢啦嘛？頭先你衝埋嚟捉住我個下仲諗住洗唔洗幫佢叫白車添。」
「我諗冇，」「Give me a Y ！Y！Give me a E！E～Who are we！」安達伸直個人望下下面，欄杆最前一排嘅黑澤企係凳上面拎住個大聲公chok住個沙鎚，嗌cheering啱啱嗌到又走音，搞到安達忍唔住笑咗出嚟比柘植側目。

「你睇下佢幾有中氣咁帶cheering，應該無事啦。」
「見你陪佢陪到唔見人，又周圍走交帶黑澤啲嘢，唔講仲以為你先係佢副手呀。」
=
*灣仔東方188係港島版信和中心，不過已經沒落咗好耐（年齡暴露）
港島大嘅本人setting佢哋係灣仔運動場所以就～

「邊係吖，好似人哋又靚又叻先襯得起黑澤咁嘅人啦。」黑澤個副社長紮住高高嘅馬尾，戴著安達畫嘅b.duck皇冠，係面上貼咗啲閃片，非常有精神咁幫手揮緊草球嗌口號，有唔少男同學都聚集咗係黃社區域，跟住囡囡揮動手勢嘅雙球睇到眼甘甘。

「襯唔襯呢啲嘢，都係係外人講嘅啫，你唔係佢哋又知幾多啫。」
「係啦人哥，知你最鍾意寫文青小毒撚攻陷女神嘅故仔啦，咁得閒不如搵下靈感寫下期更新？」安達拎咗隨身嘅速寫簿同針筆出嚟，望住運動場隨手就開始畫嘢。

「師兄呀，不如畫個大波囡囡畀人哥J下？」「妖唔好拎我啲畫嚟J呀我唔想知呀。」
「唓，咁小氣架～」柘植無理佢就搵本場刊遮住塊面訓覺。

安達諗一諗，係新嘅一頁畫左今朝黑澤著住背心短褲係朝早嘅逆光下拉筋嘅幾個姿勢，又將面前黑澤拎住大聲公嗌口號嘅肉緊樣留咗係畫紙上面。

散場嘅時候柘植返咗自己班集合，其實安達只係經過諗住望下黑澤，但係熱情嘅六角橋住佢隻手就拉咗佢埋去黃社區域一齊執嘢。諗諗吓，黑澤今日先唔舒服，又要抬紅白藍去儲物室又要拆旗又盛，多個人幫手都好，作為高form比班小朋友做粗重嘢好似好衰咁。

於是，同黑澤一人抽一邊紅白藍袋，搬咗最後一轉之後，佢哋去翻自己嘅locker攞袋。安達拎返今朝個五蚊想還俾黑澤個陣，見佢曬咗大半日塊面仲有啲青。

「黑澤，你ok呀嘛？你陣間點返去？你daddy接你？」

黑澤搖搖頭。「daddy返緊工無咁得閒啦，無事嘅，我應該搭巴士返去掛。」

見到安達皺晒眉頭咁望住自己，黑澤覺得自己身子弱煩到安達真係好愧疚，但係同時可以獨享安達嘅關心又令佢飄飄然。

「阿清呀，sorry呀......」搞到你擔心我，sorry呀。

「黑澤你咁樣......不如我都係陪你搭車返去啦。」
安達合埋locker門，對上咗黑澤錯愕嘅眼神。

『人哥，sor呀，黑澤佢唔多妥，我都係送佢返去，聽日先去188啦』柘植係看台坐咗一陣都唔見安達嘅身影，跟住佢就收到安達嘅msg放咗佢飛機。

『得啦知啦，幫我問候下佢啦。』安達條友仔，平時都唔見佢咁著緊同學架，唔通佢真係欠咗黑澤好多人情？慘遭好友連放飛機嘅柘植只好提早歸家寫多兩篇xanga。

同老師道別，無搭校巴就地解散嘅黑澤同安達好快就上咗巴士。坐係無咩人嘅上層後排，坐窗邊嘅黑澤終於都無死撐，幾乎係同安達講左兩句就挨住窗框訓著咗。可能係梗住嘅關係，黑澤都訓得唔太安穩。部車chok下chok下咁行，唔知幾時佢就同訓著咗嘅安達頭碰頭咁慢慢搭返上山。

「我成身汗咁就唔上去啦，同埋突然打攪你哋又麻煩到auntie，你今晚沖涼換藥早啲訓啦記得。」
「我盡量啦，都有啲嘢要準備。聽朝運動場門口等？我臨訓之前打比你約時間得唔得？」
「er......都得嘅，不過唔好咁夜喎。」

「bye bye，阿清，今日呢......好多謝你呀。」
「嗯，黑澤bye bye，你唔好咁勉強自己啦...」

安達落車之後陪黑澤行過長廊，去到黑澤樓下大堂就停低腳步，再三拒絕黑澤請佢上去飲罐可樂嘅提議就目送佢上樓再自己行返去搭車。

shuk730 我申請交棒

請問仲會唔會寫落去啊？

lwk_ath: 會架！QAQ 交住棒先！

Aki_Yuki: 喺個袋到拿個八達通出來，架落山嘅巴士咁岩駛近車站，踏上巴士，安達行到去落車位嘅時候，好似聽到有人在車出面嗌自己嘅名，「阿清～阿清～」。安達透過玻璃望出車，當下就無名火起。

在巴士站同佢揮手講byebye，今日搞到自己好擔心，岩岩送入樓下又走出來嘅黑澤優一。

安達從褲袋拿個電話出來，打通左對方嘅手機。

「喂，阿清。」窗外嘅黑澤9秒9接起，笑笑口咁對住安達笑，安達就反而有啲嬲嬲豬。

「黑澤！咪叫你返屋企囉！」聽到對答嘅黑澤在車窗外瞬間扁嘴。

「可樂你又唔飲，同埋上次送你到車站.....今次都想送你到車站。」黑澤委屈到好似新抱仔嘅語氣，搞到安達好衰咁恰佢咁。

「我唔想架車等陣開走嘅時候，你喺我睇唔到嘅地方冧低左... ...」安達認真又擔心又嬲嬲地，家教好到要送客，翻屋企抖下好沒。

跟住巴士夠鐘都開始駛離個站，安達都開始有啲急。
「聽話，返屋企休息，知唔知？」
「好，安達返到屋企都同我報平安？」
「知啦，你做咩仲唔走。」

窗外嘅黑澤人影越來越細，而對方嘅聲音卻又如此清晰有力咁在電波到傳入對方嘅耳仔。

「多謝你啊清弟，等愚兄我在長亭目送住你個巴士走啦。」
「唔好搞到似梁祝嘅十八相送好無。」
「中文叻叻豬嘅阿清。」黑澤忍唔住讚安達。
「唔好賣口乖，記得返屋企喔。」
「知啦，行緊返屋企啦。」 「cut線啦喔。」 「你cut先。」 「咁我cut啦。」 「嗯，真係要報平安喔，sms我啦。」 「嗯！」

剩係比安達一個人關心嘅窩心體驗，可唔可以剩係得黑澤優一擁有。 揸住手機嘅黑澤，等個巴士消失在轉角處，踩住砂石路，滿足咁一步步歸家。

第二日嘅 Sports Day，黑澤帶領住啦啦隊用東京熱bgm參加啦啦隊比賽之後，以黃社再次突破界限，超越自我，蟬聯冠軍，名副其實作為大熱話題完美落幕。

完咗之後，安達同黑澤嘅距離一下子拉近咗好多。佢哋除咗係每日會一齊放lunch嘅關係，仲係會每日一齊放學嘅關係。當然有陣時都會侵埋人哥，但係多數情況之下，人哥知道而家安達有人陪，都會一齊食完飯就返班房寫文。

今日又喺普通放 lunch。有咗便服日嘅經歷，佢哋通常會跑到落 art room 先一齊食飯。個到就好似係佢哋嘅私人基地，係一個專屬於佢哋兩個人嘅世界咁。
而安達都勢估唔到，原來佢同黑澤係可以咁啱傾。

「黑澤我同你講啊⋯我琴日睇完叮噹最新嗰集啦⋯原來佢有個法寶係記憶麵包⋯如果我都可以有就好啦⋯咁我中文 quiz 就唔使背範文背得咁辛苦⋯唉」

「我琴日都有睇呀，係咯我都好想擁有。不過背範文其實都唔係太難嘅。中文Quiz 係咪下個禮拜三？一係今個禮拜五你上我屋企，我哋一齊溫書囉」
「喂好喎~! 實不相瞞⋯我一直都好掛住上次係你屋企食嗰件文華蛋糕⋯」
「哈哈哈哈你好彩啦，我媽咪琴日又買咗。我留我個件俾你食啦～聽日上嚟你就食到」
「Waaaaaaa多謝澤兄你嘅大恩大德，小弟沒齒難忘啊」
「平身啦清弟哈哈哈哈」

佢哋每一日嘅lunchtime就係喺度鳩吹。但係今日嘅lunch time，就突然間出現咗一個人，打斷咗佢哋嘅二人世界。

「黑凙！嘩⋯痴線你做乜過咗嚟呢度食飯㗎，我搵你搵咗好耐啦」

katieleung1206:

身為副社，全校同黑澤行得最埋嘅女人，Melody成日都喺人前扮到好唔在意黑澤咁，但係其實，佢內心都唔知幾想收伏到黑澤呢個咁完美嘅男人。每日默默咁留意住黑澤嘅佢，其實好早已經發現咗，自從 sports day 完咗之後，黑澤 lunch 就會消失。過咗成個禮拜，Melody終於都揭開謎底。原來獨佔黑澤嗰個人就係安達？

「Melody？你點知我喺度㗎？你搵我有急事？關於黃社㗎？」
「um，唔係，其實只係我chem功課唔識做，想問下你姐，你知啦一陣就chem堂，唔交嘅話實畀李sir鬧死」

更新啦

lwk_ath: 嘿嘿嘿多謝你一直都有睇

好耶有更新

一更新就播首東京熱bgm!!!!!!

更新留名！期待上標既一日

「咁啊...」黑澤有少少唔好意思咁望住安達。「但係我同安達佢食緊飯喎。」

「唔緊要啦，我地都食完飯啦，你咪幫下Melody佢囉。」安達口入面係咁講，但係唔知點解心入面硬係有啲唔多開心咁。黑澤宜家呢條友重色輕友啦... Melody一出現就唔理我架啦。

呢個時候，安達仲未真正明白到自己見到Melody會咁唔開心嘅原因。

「好啦咁...」黑澤都見到安達個嘴仔有啲扁，不過Melody仲喺度佢都唔可以講啲乜：「咁Melody你邊題唔識啊？我睇下幫唔幫到你？」

「黑澤你不如跟我番課室先？我啲書放晒喺課室啊。」

「不如你...拎啲書過嚟呢度我教你？」黑澤唔係好想就咁留低安達一個喺度。

okatsu:
「下...但係拎啲書過嚟好遠啊～」Melody 趁黑達唔覺意嗰陣怒睥左安達一下，搞到安達個嘴仔更加扁。咁而家係我同黑澤佢一齊食飯在先架嘛。

「你走啦！」安達企埋起身推左黑澤出門口。

「咁...好啦...」比人推到門口嘅黑澤感覺到安達唔係好開心，不過比人推到出門口又冇理由唔走。

「係呢，安達同學啊。」Melody 見黑澤已經出咗去，即刻就喺安達耳邊講：「黑澤係我嘅...你唔好諗住同我爭...」

Melody 講完就笑住咁同黑澤番左課室，留低左安達自己一個坐左喺Art room 對住嗰個食左一半嘅飯盒。

「同Melody 爭黑澤？佢講咩啊？我同黑澤係好朋友黎架嘛！我又唔係女仔，點會同佢爭男仔啫！」安達一路諗叉起一舊凍左嘅玉子燒放咗入口咬。

點解...今日舊玉子燒咁酸嘅？

安達咬咗一啖唔好食嘅玉子燒就無咩心情食埋個飯，拎起本畫簿求其畫啲嘢。

好似好耐之前就見到Melody成日同黑澤一齊，唔知係中二定係中三？總之有黑澤嘅地方通常就會見到melody跟出跟入，melody讀書叻又靚女，聽聞屋企都幾有錢，企係黑澤隔離都好襯。
係呀，能力定外貌都門當戶對嘅佢哋兩個睇落就好襯。

又係嘅，黑澤只係報返自己幫佢手搞sports day嘅恩先同自己熟少少，同由低開始打拼到一齊做社長，參選個陣係學校門口嗌到聲沙嘅melody點同呢。全校嘅學生家長老師清潔姐姐有邊個女仔唔鍾意黑澤先得架，會比排頭位嘅melody起晒鋼真係好正常好合理。

藤崎響鐘個陣返到art room個陣啱啱見到安達，但係安達失魂落魄連招呼都唔記得打就行咗返班房。枱面上面孤零零咁漏咗本打開嘅畫簿，橫跨兩頁紙畫咗一patpat深淺不一嘅藍色，藤崎望咗陣都睇唔出安達頭先畫咩，就收埋本簿等佢遲啲過嚟拎返。

黑澤放學總係好忙，淨係見到個書包係位，人就唔知去咗邊度。
鍾意係學校清晒啲功課先走嘅安達今日唔知點解有啲煩躁，佢執齊晒啲嘢走去隔離班搵人哥一邊吹水一邊一齊計數。
「終於肯嚟陪下阿叔我啦咩，呢排唔使陪黑澤？」
「你講咩呀你好似同我同年架喎，仲有呀邊係我陪黑澤吖，我阻住人就真。」
「哦......你哋嗌交呀？」
「無呀，邊有啫，無事。」

突然窗外面一陣吵雜，安達同柘植都企咗起身行去窗邊，下面嘅籃球場圍住好多人係度，亦都有啲人放學孭住書包經過企咗係外圍睇熱鬧。
人群嘅中心隱約見到兩個人，因為時間都晏太陽開始落山，安達係照到籃球場地下變成紅紅橙橙嘅夕陽西斜之下勉強認到係一男一女。

「...佢！...佢！」深秋嘅風將人群嘅起哄吹散，安達無聽清楚下面啲人係到叫緊乜嘢，直到個女仔拎住個大聲公用無法忽略嘅聲量開口。係melody。
「黑澤優一，我中一就開始鍾意咗你四年，請你做我男朋友啦！」

風終於都停止，樓下嘅起哄瞬間就衝入安達嘅耳仔入面。
「應承佢！應承佢！咀佢！咀佢！」

shuk730:
由上而下既角度睇唔清楚黑澤嘅表情，安達係窗前偎前見到黑澤講左句野，但係比人群既聲浪所掩蓋——安達發現其實佢唔係好想聽清楚黑澤點樣回應。

老實講，安達唔係第一次目擊黑澤俾人告白。
不過，咁盛大，咁奮不顧身咁去做既的確係第一次。
好似西斜咁刺眼又炙熱，Melody聲嘶力竭咁揸住大聲公懇求，仲有黑澤企係籃球場正中間嘅身影以身後既夕陽一同烙印係安達既眼底。

黑澤同melody慢慢走向對方，大家爆發既歡呼聲更加熱烈，安達覺得比撲面而來既聲壓搞到好似透唔到氣咁，佢闔埋眼轉身抽起個背囊就掉低呆咗嘅柘植走左。

黑澤舉起隻手，做咗個收嘅手勢。

路過埋堆食花生嘅同學一見到都好快收曬聲，想睇校草澤少同社花Melody嘅校園強強戀愛啊。

黑澤凝視住好認真嘅Melody。

「你點解鐘意我?」

Melody深吸一口氣，將谷咗4年嘅野一次過洩洪式表白！就連黑澤都係第一次見到佢如此唔理智嘅時候。

「因為黑澤優一你同你個名一樣，顏值，學習同領導能力，各各方面優越過人。而我！又叻女又靚！我地叮噹馬頭！但好再係同一個社，我願意做你嘅賢內助！再加上我地都磨合咗4年，一直都相安無事，所以我覺得我地一定好適合對方！但我覺得仲未夠！我想要我地真係在埋一齊！

你願唔願意做我男朋友啊！」

哇！今日乜日子甘鬼爆嘅。
啲同學仔都呆咗幾秒。
「接受佢啦！社長！」「哇，好勁爆啊！」「Melody我撐你呀！」「十卜十卜！」「澤少，受佢溝啦！！」

澤少望咗一眼四周圍嘅同學仔，大家又自動自覺安靜返，跟住佢開聲。

「依個係你想要嘅野，你有沒諗過，我想要啲乜野?」

「我唔明你想講乜野?」Melody開始有啲眼濕濕，對手抓住冷衫下擺。

而黑澤知道佢又想來料搏同情，識你四年知你乜料啦。心水清嘅佢都好明白宜家心入面依刻住咗個人，但果個唔係Melody。

依個時候黑澤真係沒乜心機想聽落去，當佢見到拓植都在到嘅時候，隔離沒見到安達個身影，唔知點解就覺得安達實係誤會咗嘅預感好強烈。

黑澤想，速戰速決。

「我地，雖然工作拍住上。但做野還做野，感情還感情。我對你，沒想發展拍拖嘅意思。」

講完，就轉身走人。佢有野想同安達交代返。

Aki_Yuki: 果下黑澤佢想留低個背影，依頭就被Melody死纏爛打甘扯住。

「黑澤優一！你唔好走住！我地在社務齊上齊落，你需要我，依道仲有邊個有我甘襯你哦！」

「Meldoy你唔好把件事搞到甘薑。」

「我想聽你真心果句！」

「多謝你鐘意我。但我，沒鐘意過你。」

Melody失力甘放開手，開始暴喊。

黑澤遞咗張紙巾比佢，講咗句sorry。Melody唔肯接。

於是黑澤將紙巾比咗企在Melody嘅隔離嘅閨蜜Kitty，叫佢睇住Melody，唔好諗唔開做傻事。

啲花生友見住黑澤行埋來想走，自動自覺摩西分紅海比條過道佢離開。

黑澤邁開長腿好快跑返課室。

一入房見住安達個位空咗。下一秒佢就喺 班房沒乜人嘅位置打電話call安達。 個手機響咗沒幾秒，安達cut佢線。 黑澤覺得對面實係嬲咗啦。

電話又唔聽，班房又搵唔到，黑澤愈嚟愈擔心安達，於是周圍搵人哥，終於搵到嘅時候人哥又話唔知佢走咗去邊。

「頭先食食下你同melody花生佢就突然間自己走咗去啦，都唔知做乜」
「咦、呃、咁你估唔估到安達會去邊？我art room同圖書館都搵佢唔到啊」
「Rrrr，你試吓去一樓空咗做自修室個間班房？佢鐘意去個度自己一個靜下嘅，可能覺得你哋頭先太嘈掛，唉不過你唔使太擔⋯」
「唔該晒人哥！」
「下？」

向住一樓最尾個間班房全速前進，受住一路上每個同學嘅注視，黑澤終於嚟到自修室嘅門前。
但係出面望入去一盞燈都冇開喎？
不過唔理得咁多啦，佢敲咗兩下門就入咗去。

咁細個班房，一眼就望到安達成個人趴喺最角落嘅枱面，一動也不動，連有人入咗嚟都唔知。

細細力拉開安達前面個位嗰張凳，黑澤坐低就忍唔住摸咗一摸安達又圓又馮鬆嘅頭頂。

「安達？你喺度做咩啊⋯唔舒服啊？」
「？！點解你係度嘅？」

突然間聽到聲嘅安達一彈起身見到係黑澤就後退多兩步。雖然淨係靠住窗外嘅光線有啲模糊，但係都冇令到黑澤錯過咗安達好似紅紅地咁嘅眼角。

「我擔心你啊嘛，周圍都搵你唔到⋯頭先食lunch sorry啊⋯我都唔想掉低你㗎⋯」
「算啦，我明嘅。」

明顯冷漠嘅態度真係嚇到黑澤個心穿咗個窿咁濟。唔通頭先lunch件事真係搞到佢好唔開心!??

「唔係咁㗎，嗱，我已經同Melody講好咗，佢以後都唔會再食飯嚟搵我㗎啦」

katieleung1206:
「下，咁會唔會唔係咁好」話晒人哋而家都係你女朋友。安達差啲就想講埋出口。
「唔會啦，不嬲食飯我都同你食㗎啦⋯」
「唔使啦！我以後自己食返得啦！」

安達幾乎用咗成世人最唔耐煩嘅語氣講咗呢句說話。

「你、你做咩咁嬲姐⋯」
「我都冇嬲⋯」

「安達...」平時轉數極快嘅黑澤呢刻居然唔係好知應該講啲乜。佢只能夠不停重複住同一句：「Sorry...」

「Sor咩ry啫？」安達終於忍唔住大爆發：「你都冇做錯做咩要同我講sorry啫？咁你又靚仔人又叻，有幾個靚女鍾意你有幾出奇啫？人哋都搞到咁大囉，你咪應承佢囉！我ok架喎！以前我不嬲都係自己食飯架啦！仲有人哥陪我添啊！你要去拍拖咪去拍拖囉！」

「安達唔通你...」黑澤突然有個諗法：「唔通你呷醋？」

「鬼呷你醋啊！我係你邊個啫？」安達依然都係咁嬲：「我係你朋友咋！做咩要呷你醋啊？」

「其實...我見到安達你咁嬲... 我有少少開心...」黑澤好認真咁講出呢句。因為...佢感覺到原來安達居然都咁在乎佢。

「你係咪傻架你？比人嬲緊仲咁開心！」

「唔係啊... 我見到安達你咁重視我呢個... 朋友... 我真係好開心啊。」朋友...係啊，呢一刻安達同黑澤都依然係朋友關係... 頭先黑澤差啲想衝口而出表白，不過佢忍住左。

「唔得，我向安達嘅告白一定要係最浪漫嘅。宜家未係時候。」黑澤同自己咁講。佢一方面好想比安達一個最浪漫嘅告白，但係令一方面，佢又好驚揭破左之後會嚇走安達，所以佢要再觀察下先。不過... 宜家睇安達呢個反應，可能都差唔多係時候啦。聖誕？嗯，可能聖誕會係一個告白嘅好時機。

「黑澤你正傻佬黎嘅...」安達嬲嬲下突然自己笑左出聲：「要我原諒你都得！但係你要應承我下次唔可以再食食下飯走左去架！仲有！我要你送上次行街嗰陣我睇中嗰隻hello kitty 公仔比我！」

okatsu:
「得得得！」黑澤見自己終於成功氹番安達鬆左一口氣。莫講話一隻公仔啦，十隻都買啊！「既然而家都放學囉，行啦我哋即刻去買！」

「哼，算你啦！」安達笑住咁執番啲嘢：「咁仲唔行！我要去買公仔啊！」