終於真的有決心想轉工了，一直俾人話你份工又唔關工程事入則姐，聽到不爽實有但我覺得我只可以同意你一半。
先講講我的工作吧：幫某路氹大型賭城區內的商舖餐廳之類入則去政府審批甚至攞牌。咁的確聽落去“啊咁即係交文件做文件野姐”此時我唔打鑊你我覺得自己eq都加左唔少。交文件之前既各種野準備，聯絡，自己check圖，檢收呢d野就俾你一句文件野姐ko曬真的多撚謝曬你（拍手
但如果你工程野就真的只有check圖檢收呢樣就真係冇錯既，又冇自己設計過裝修時又冇現場係度睇，但我份工同工程相唔相關就睇你點睇啦。

咁商舖呢野當然唔係一間起兩間止啦，一個月廿至三十間左右啦，當中我負責曬就大約五分四，餐廳部份就會俾另一位同事跟但到左文件準備同聯絡的時候我都要幫手，因為佢年紀老成日乜都唔記得，即使佢自己有memo.....
咁你話我份工忙唔忙多唔多野做？多嫁但唔趕lo，所以可以準時收工，一個長命工夫長命做的概念。所以俾人嫌我份工唔係工程之外還經常被嫌成日準時收工=冇野做好輕鬆，啊你一星期返六日半知你受人重用多野做好棒棒。真的每次一班人出黎食飯就下下係度拋書包真係好煩，自己冇得拋先唔理，得啦知你犀飛利啦哎。。。

咁今年開始呢公司同幫入則間顧主份合約有個新的規定：商舖D圖寄到黎後要十日之內要審批完send mail通知。可能係因為我未跟手之前發現有一堆舖冇review過而要定。
咁聽落好似冇問題，但一本黎係十日，十本黎又係十日，廿本黎都係十日。有次一日黎廿本我成個人除左苦笑都唔知俾咩反應，但都係十日之內要睇曬佢，哈哈。
咁我自己平均一日可以睇到兩本至兩本半左右，但呢個係冇野做既情況下而已，得閒呢度又要乜乜乜準備，個度又話有人黎夾野，個頭又要去入則，而且個十日期閒內剛好又有幾間餐廳收則，去一次又冇左成半日，哈哈。結果咪要俾幾間其他team既人幫手睇囉。

咁有俾其他team的人幫手開始我大佬就開始上癮啦，個次之後佢就經常性叫我俾咁D佢地幫手，不理個數量我搞唔搞得點。咁佢地會幫手睇D咩？睇機電野，我就睇建築野。啊呢我，機電工程師黎耶，唔俾我睇機電叫我睇建築同殺左我好似冇咩分別。然後佢地都有野做嫁，佢地忙過我然後要幫我手 話咩佢地唔肯就同佢講佢叫佢地幫，哈哈我諗我係佢地背後都唔知講過幾多百萬句粗口了。
其實個十日規定根本就攞自己黎趕，我十日內睇完圖有意見你都唔係有規定日子內要答返我的意見其實冇意思既，則還是入唔到冇結果的。而且我大佬久唔久D好無理的要求，所有野都要hard copy要留係公司唔可以寄倉或者只留soft copy，咁自己想像幾百間舖睇完冇回覆加一堆唔可以寄倉的要留住“唔知幾時”用得著的文件，又或者係倉度攞返黎用完又“唔知幾時”有間唔大的公司係點的樣子。

問點解唔晨早轉工？
咁我都想學到一份工程入則呢個“唔太”工程相關的步驟的成個程序係有野學的，而且同team的同事同大佬都係鬼佬都可以加強返d英文，但現在d野成日都派黎派去我真的覺得我應該真的要走了。。。
唔試下問老細轉去其他team做下？
有一次大老細有叫我去順便跟其他team跟其他大project，然後俾我大佬知道左就不爽唔俾我跟，哭。有次我上一手個大佬打俾我叫我幫佢落樓下攞d野而已佢都黑曬面。。。佢就係一個唔肯放自己team人去幫其他人手但又會叫其他人幫佢手呵呵。。。。。。

其實工作還有更多野講但諗唔到就算啦。所以就係呢野都學得七七八八而又開始俾人壓住但又感受唔到自己係公司的位置就開始想轉工了。