Hit Hot新料 慳油激戰到亞洲　 D.I.Y.怪車最騎呢　 Shell Eco-marathon Asia 2011

慳油大使　陳豪撐場

SEM除咗有車睇，都一樣出動到明星效應，香港、新加坡同馬來西亞都有藝人代表出席為自己車隊打氣。不過最勁都係舊年開始簽咗 Shell做慳油大使嘅陳豪，筆者 2日全程同佢一齊，總之喺有人嘅地方，唔夠 3分鐘就會有人搵佢影相、簽名，真係估唔到原來喺馬拉都紅到癲！

Shell搵阿 mo做 icon，當然係因為形象正面兼玩開車，而且自己都有啲慳油心得，除咗叫人睇遠啲，唔好踩咁大油同少啲踩 brake呢啲最正路嘅招數，仲大爆叫人唔好學嘅絕招！

「有時唔夠油，我就會空波滑行，唔好以為冇乜幫助，其實可以慳到好多 o架！不過呢招都要有啲技術，要等部車有咁上下推動力，條路又少少斜先可以推去 neutral滑行，大家真係唔好學。」

玩車都要慳家

唔睇緋聞，淨係睇阿 mo玩車都知佢專一，澳洲讀完書返香港之後買咗部平價易手開篷 roadster第 1代 Mazda MX-5，一揸就揸足 6年！「我不嬲都鍾意車，一 18歲就喺澳洲考牌。

不過我係一個好慳家嘅人，一直有個理念，新車落地會即刻貶值，呢個理念驅使下，我唔會花錢去買車。對我嚟講靚呀、快呀都唔緊要，最緊要先睇個價錢，然後先睇有乜選擇。」

其實阿 mo連部陳年 MX-5都冇諗過換，只係一個意外嚟。「當年 Mazda知我揸 MX-5，就話 sponsor我揸最新嗰代一年，部車灰色、橙頂、再加橙凳，第 1代又好嘈、膠邊又漏水、冷氣又唔凍嘅問題冇晒。

我就衰嘅，坐定粒六以為架車借我揸 1年……吓……就得 o架啦！就賣咗部車舊畀朋友，點知佢收番，咁就冇咗架車！」不過阿 mo話咁都好，可以乘機換咗架 2個位自私車，之後就買咗架 7座 Prado揸到家又 4、 5年，真係專一到暈！

不過傾落筆者又唔覺阿 mo孤寒，反而係堅節儉， Shell絕對冇搵錯人！「喺澳洲我第一部車係好舊嘅 Hyundai Sonata，嗰時一定要學識換胎同埋 check車頭水，因為成日水滾。

但返到香港見家啲人有乜都全部去車房做晒，連換胎都唔識，我覺得唔係幾好囉，始終有好多好原始嘅嘢都要應該學嘅！」

慳儉陳豪都有奢侈 dream car，就係 550萬 Bentley Continental Sportsports開篷，鍾意佢出嚟嗰種 presentation，唔只齋 power，形象、質量、 class都啱晒佢口味。

阿 mo上年都試過喺 Sepang場玩 1L Challenge，梗會提點吓今年 4位香港車手。