〈阿母的話 A-bú ê Uē〉／《予你的歌 Hōo Lí ê Kua》／農村武裝青年著獎感言：
「足緊張的！感謝阮老爸老母自細漢佮我講台語，我欲感謝阮囝予我有機會將台語繼續講落去。我嘛感謝金音獎在座的評審委員，對農村武裝青年的肯定。下面我欲講一个故事，短短仔爾爾逐家莫緊張。
我國校仔的時陣，佇學校是袂使講台語的，但是有幾擺阮阿母送便當去予我的時陣，用伊上生份的華語佮我的同學講話。阮阿母的華語，就帶有台語的腔口的彼款華語，你知影彼當陣的我，是感覺足見笑的，希望阮mă--á會當緊轉去。時間過了三十年了後的這馬，換我𤆬阮囝去學校，阮兩个用全台語咧開講，而且時代嘛已經進入甲會當自由講家己母語的階段，結果煞無任何一个同學會當佮伊用台語開講，這是我四十年來親身的性命體會，嘛是〈阿母的話〉這條歌欲講的代誌。